O físico Jorge Mira impartirá as xornadas formativas "A Luz da Ciencia" co dolmen de Dombate como protagonista
A primeira das aulas centrarase na astronomía e abordará ademais o papel que xogou esta ciencia na orientación da definida polos presentes como "a catedral do megalitismo".
Por E.P. | SANTIAGO DE COMPOSTELA | 23/03/2021 | Actualizada ás 15:38
As aulas científicas 'A luz da ciencia', dirixidas polo físico e investigador galego Jorge Mira, toman como eixo principal o Dolmen de Dombate (Cabana de Bergantiños,), "un dos monumentos máis representativos da cultura e o patrimonio galego" para abordar especialidades tan diferentes como a astronomía, a xenética e a bioloxía, entre outras.
O director das aulas, físico, investigador e profesor da Universidade de Santiago de Compostela, Jorge Mira, presentou este martes o curso formativo acompañado por representantes das entidades colaboradoras: o alcalde de Cabana de Bergantiños, José Muíño Domínguez; e o deputado de Contratación e Patrimonio da Deputación da Coruña, Xosé Luís Penas.
As xornadas arrincarán o 27 de marzo e celebraranse trimestralmente ata decembro. En outubro, segundo avanzou Xosé Luís Penas, terá lugar unha sesión "especial" dedicada ao patrimonio. Todas elas estarán dispoñibles nas páxinas webs da Deputación da Coruña e o concello de Cabana de Bergantiños, ao non poder seguirse presencialmente debido á crise sanitaria.
A primeira das aulas centrarase na astronomía e abordará ademais o papel que xogou esta ciencia na orientación da definida polos presentes como "a catedral do megalitismo". Todos coincidiron na importancia da construción de Dombate non só respecto da arqueoloxía ou a astronomía, senón tamén como un "símbolo cultural, un aceno de identidade do galeguismo".
O astrónomo e colaborador na Casa das Ciencias da Coruña, Borja Tosar, será o encargado de inaugurar a xornada con 'Cousas e movemento do ceo', unha charla "básica e clave", en palabras de Mira, "para entender como funciona o ceo".
A continuación, o investigador do Instituto de Ciencias do Patrimonio (Incipit-CSIC) e presidente da Sociedade Europea para a Astronomía na Cultura, Antonio César González García, profundará en como a astronomía definiu a orientación dos monumentos antigos a partir dun estudo arqueoastronómico da construción megalítica de Cabana.
UNHA ESTRATEXIA POR EXPLOTAR
Esta primeira sesión continuará coas charlas do profesor Mira 'Busca dous puntos do último solpor da Europa Continental" e do biólogo e experto en imaxe científica, Fernando Rey Daluz, 'O camiño do Sol a través da paisaxe'.
"A provincia da Coruña é o principal balcón ao sol de Europa, é onde se produce o último atardecer continental. Ten un encanto distinto", explicou o investigador galego, que aproveitou para facer un chamamento á cidadanía para "apreciar o que hai á súa ao redor".
Mira recalcou que a situación privilexiada da Costa da Morte e o halo máxico que o seu atardecer e ceo estrelado pode ofrecer a un visitante "que busca cada vez máis emocionarse", ofrece unha "estratexia pendente de explotación" do turismo astronómico. Sobre estas posibilidades debaterán algúns dos relatores na mesa redonda coa que finalizará a primeira xornada.
O obxectivo deste curso de formación, "pioneiro" como recalcou Jorge Mira, "é facilitar o acceso de información científica a toda a sociedade", unha meta compartida e na que tamén fixo fincapé o representante da Deputación da Coruña. "O noso riquísimo patrimonio debe servir como referente para accións como as que agora comezan no Museo de Dombate".
Sobre esta institución, o deputado informou de que o proceso de remusealización en Dombate "xa comezou". Unhas obras que "dotarán ao museo de novas tecnoloxías e unha nova imaxe máis adecuada á época actual".
