A Cámara da Coruña e Abanca acordan actividades para mellorar a competitividade empresarial
As actividades previstas, tal e como detallou Abanca nun comunicado, estrutúranse ao redor de tres eixos: accións encamiñadas a facilitar a inserción laboral, programas de apoio a emprendedores e actividades orientadas a mellorar a competitividade empresarial.
Por E.P. | SANTIAGO DE COMPOSTELA | 06/04/2021 | Actualizada ás 16:25
A Cámara da Coruña e Abanca acordaron este martes colaborar no desenvolvemento de distintas actividades orientadas a mellorar a competitividade empresarial e a apoiar aos emprendedores durante 2021.
Ao acto de firma asistiron o presidente da Cámara de Comercio coruñesa, Antonio Couceiro; o director de Negocio Institucional en Galicia, Asturias e León, Jose Lino Comesaña; e o direcotr comercial da entidade financeira, Gabriel García Eiroa.
As actividades previstas, tal e como detallou Abanca nun comunicado, estrutúranse ao redor de tres eixos: accións encamiñadas a facilitar a inserción laboral, programas de apoio a emprendedores e actividades orientadas a mellorar a competitividade empresarial.
Dentro destas liñas, a formación comprenderá "aspectos tan diversos" como a elaboración de plans de igualdade, desenvolvemento de marca persoal corporativa, xestión de cobros, liderado de equipos e mercadotecnia dixital, entre outras.
"O obxectivo de Abanca é seguir mostrándonos próximos ás nosas empresas e emprendedores e axudarlles coas súas necesidades para que poidan afrontar os retos que demanda a situación que estamos a vivir", indicaron os representantes da entidade.
Antonio Couceiro, pola súa banda, sinalou que o acordo é froito "do compromiso da entidade cameral coa dinamización do tecido empresarial e co desenvolvemento económico da Coruña e a súa área de influencia".
Debido ás circunstancias sanitarias provocadas pola crise de covid-19 e aínda que as actividades formativas poderán seguirse de forma presencial, tamén estarán dispoñibles en streaming e en liña. Os interesados poden consultar toda a información no número de teléfono 981 216 072 ou en formacion@camaracoruna.com.
