Recuperan "en liña" a primeira selección da obra de Alfonso X polo seu 800 aniversario
O Museo do Pobo Galego de Santiago acolle ata o 26 de setembro a exposición 'Tigres coma cabalos', dedicada a Xela Arias
Por Europa Press / Redacción | Compostela | 30/07/2021 | Actualizada ás 19:55
A Real Academia Galega editou (RAG) a primeira selección da obra de Alfonso X no ano 1980, cando o Día das Letras Galegas foi dedicado a este rei ao que se lle atribúen as 'Cantigas de Santa María'. Agora, con motivo do 800 aniversario do nacemento do monarca, a institución recupera este volume, titulado 'Afonso X e Galicia: e unha escolma de cantigas' nunha edición dixital e de acceso libre a través da web academia.gal.
Trátase dunha edición a cargo de Xosé Filgueira Valverde (1906-1966), protagonista das Letras Galegas de 2015, que reuniu e comentou nesta publicación as sete cantigas que teñen unha localización galega clara, xunto a outros catro sobre milagres de peregrinación a Santiago e dúas sobre lendas relixiosas universais. Ademais, esta selección complétase con sete pezas profanas de escarnio e maldicir con referencia a personaxes galegos.
"Esta publicación que agora recuperamos é unha achega singular dun erudito que foi quizais o primeiro especialista en referencia internacional, Alfonso X e as 'Cantigas de Santa María'", destaca o académico Henrique Monteagudo.
Filgueira Valverde abre o volume pondo o acento no paradoxo que supón Afonso X para a vida histórica de Galicia. E é que, en palabras de Monteagudo, é un "clásico" das letras galegas do medievo pero, con todo, foi "un rei alleo cando non adverso" a Galicia.
"Esta interpretación da relación histórica de Afonso X con Galicia é polémica, pois en realidade buscou reforzar o poder monárquico enfrontándose coa aristocracia e coa Igrexa, que eran moi poderosas en Galicia", explica o académico.
EXPOSICIÓN DE XELA ARIAS EN SANTIAGO
Por outra banda, o Museo do Pobo Galego de Santiago de Compostela inaugurou este venres a exposición da Xunta 'Tigres coma cabalos', dedicada a Xela Arias, autora protagonista das Letras Galegas de 2021. A mostra exhibiuse previamente no Museo do Mar de Galicia, en Vigo, e permanecerá na capital ata o 24 de setembro.
No acto de inauguración, o secretario xeral de Cultura, Anxo M. Lorenzo, e o de Política Lingüística, Valentín García, destacaron que esta iniciativa recupera "unha das obras máis emblemáticas e vangardistas" da autora, á vez que resaltaron o "carácter pioneiro do proxecto creativo" por realizarse en colaboración co fotógrafo Xulio Gil, o seu marido.
