Xosé Monteagudo, premio Repsol de narrativa breve en lingua galega

Xa hai gañador para o Premio Repsol neste 2021. O escritor Xosé Monteagudo vén de se distinguir co galardón de narrativa breve en lingua galega na súa XV edición coa obra Eternity. Así o comunicou esta mañá na sede da Real Academia Galega o académico correspondente Xavier Senín, voceiro do xurado, que define Eternity como “unha novela que nos invita a reflexionar sobre o futuro dunha sociedade que aspira á permanencia concibíndose coma un inmenso arquivo dixital”.

Á última edición do galardón convocado pola Fundación Repsol coa colaboración de distintas institucións, entre elas a propia RAG, foron presentadas 36 obras entre orixinais e inéditas que contaron cunha extensión mínima de 50 folios e un máximo de 120. O premio ten unha dotación de 12.000 euros e implica a publicación da novela gañadora na Editorial Galaxia.

O xurado estivo composto por Estíbaliz Espinosa, Carlos González Lema, María López Sández, Dolores Vilavedra e o propio Xavier Senín, que participou no anuncio da obra premiada xunto ao presidente da RAG, Víctor F. Freixanes; a directora da refinería de Repsol da Coruña, Natalia Barreiro; o secretario xeral de Política Lingüística, Valentín García; o director xeral da Editorial Galaxia, Francisco Castro; e o presidente da Asociación de Escritoras e Escritores en Lingua Galega, Cesáreo Sánchez Iglesias.

Xosé Monteagudo Folgar (Moraña-Pontevedra,1965) é licenciado en Dereito pola USC e comezou a súa traxectoria literaria ao obter o accésit no premio Modesto R. Figueiredo do ano 2001 co relato “O engado do triángulo”. A súa primeira novela, As voces da noticia, resultou gañadora do Premio Blanco Amor no ano 2002. En 2006 publica a súa segunda novela, titulada Esta historia, na que reconstrúe unha biografía xuvenil a partir das lembranzas universitarias. En 2009 recibiu o Premio García Barros e foi finalista do galardón Frei Martín Sarmiento pola novela Un tipo listo. No ano 2012 publicou a novela O curioso mundo das persoas normais e no 2017 obtivo o premio á mellor obra narrativa da II Gala do Libro Galego e o Premio San Clemente Rosalía-Abanca por Todo canto fomos.