Unha escisión do PP en Lugo podería regresar ao partido de cara ás eleccións municipais

O Foro Lugo Independente, unha escisión do PP lucense, está próximo a "fusionarse" nas filas populares, tal e como avanzou o presidente e fundador desta formación política, Ildefonso Saavedra. Saavedra, que foi militante do PP, confirmou que se produciron "contactos", á vez que presume de ser "moi amigo" da recentemente reelixida presidenta provincial dos populares de Lugo, Elena Candia.

Neste sentido, lembrou que mesmo acudiu ao congreso provincial do partido, celebrado recentemente en Outeiro de Rei, e no que Elena Candia foi reelixida como presidenta para o próximos catro anos con case o 98 por cento de apoios. "Eu son moi amigo de Elena Candia, fun ao Congreso. Aínda non hai nada definitivo, todo irá en función de que nos propoñan ideas interesantes para Lugo e para sacar ao bipartito (goberno de PSOE e BNG) da cidade", explicou.

Con todo, tras recoñecer "contactos", Saavedra precisou que "quedaron para falar e para coñecer as propostas que poidan facer, en función das ideas" que contempla o seu programa. "O que nos interesa é como afrontar a economía da cidade, a mellora da súa estrutura urbanística, que mellore Lugo, porque a verdade é que Lugo está a perder moitos ingresos", apuntou, antes de apuntar que o que lles interesa "é que nos propoñan ideas novas e nós sacrificarémonos e apoiaremos ao PP".

INCORPORARSE

Entre outras peticións, aspiran a que se incorpore a "alguén" do equipo de Foro Lugo Independente "na próxima candidatura" do PP ao Concello. Esta formación política, xurdida entre críticos ao PP lucense, concorría nas pasadas eleccións municipais sen que obtivese representación no municipio.

Elena Candia, viceportavoz do PP. PP