Galicia é unha das autonomías con menos denuncias por ocupación de vivendas
A falta de pagamentos de aluguer protagonizan xa case o 80% dos desafiuzamentos en Galicia
Por Europa Press / Redacción | SANTIAGO DE COMPOSTELA | 02/12/2021 | Actualizada ás 12:51
As demandas por ocupación ilegal de vivendas descenderon no terceiro trimestre do ano un 35% respecto ao ano previo á pandemia en Galicia, a cuarta comunidade autónoma con menor taxa por poboación deste tipo de procedementos.
Así figura no informe 'Efectos da crise económica nos órganos xudiciais' elaborado pola sección de estatística do Consejo General del Poder Judicial (CGPJ) e que recolle datos da conxuntura dos xulgados galegos durante o último trimestre.
Entre xullo e setembro, os órganos xudiciais de Galicia ingresaron un total de 22 demandas por ocupación ilegal de vivendas en propiedade de persoas físicas, entidades sen ánimo de lucro e organismos públicos posuidores de vivenda social.
Trátase dun 35% menos que no mesmo período de 2019, ano previo á pandemia que, como reflicten as cifras solicitadas polo CGPJ, tiveron un importante impacto no funcionamento dos xulgados galegos. Deste xeito, no que vai de ano presentáronse nos xulgados galego 55 procedementos por ocupacións ilegais, 22 no último trimestre, outros 22 no segundo e 11 no primeiro.
Con estes datos, Galicia é a cuarta comunidade autónoma con menor número de casos nos xulgados por poboación, cunha taxa do 0,8 de demandas por ocupacións por cada 100.000 habitantes, cifra que só é menor en Asturias (0,7), o País Vasco (0,6), e Navarra (0,2).
De feito, Galicia tamén presenta un mellor comportamento en canto á tendencia do número de denuncias vinculadas a ocupacións ilegais de vivendas, dado que o descenso é case cinco veces maior en termos porcentuais que no conxunto estatal, onde descenden un 7,8%.
O 80% DOS DESAFIUZAMENTOS, POR FALTA DE PAGAMENTO DE ALUGUER
Ademais, o informe do CGPJ revela que case o 80% dos lanzamentos executados durante o terceiro trimestre do ano producíronse por falta de pagamentos do alugueiro.
En total, entre xullo e setembro houbo 320 lanzamentos, 254 deles por falta de pagamento da renda de alugueiro, 59 por execucións hipotecarias e sete por outras cousas. Estas cifras supoñen unha taxa de 11,9 lanzamentos por cada 100.000 habitantes, uns sete puntos inferior á estatal, que é de 18,3.
Trátase dun 28% menos dos desafiuzamentos rexistrados no mesmo período de 2019, cando houbo 445. En comparación co terceiro trimestre de 2020, a baixada é menor, do 10%, aínda que hai que ter en conta a situación sanitaria asociada á pandemia e os seus efectos nos xulgados.
Con todo, o número de execucións hipotecarias aumentou un 60% respecto de 2019 no terceiro trimestre, no que se presentaron 222 procedementos para demandar o pago de débedas.
CONCURSOS, DESPEDIMENTOS, CLÁUSULAS SOLO
Pola súa banda, os concursos rexistrados nos xulgados do mercantil mantéñense en cifras similares ás dos dous últimos anos, xa que os 70 do último trimestre son os mesmos que houbo en 2019 e lixeiramente inferior aos 78 de 2020.
Os concursos de persoas naturais non empresarias sumaron 84 casos, un 68% máis que no terceiro trimestre de 2019, cando houbo 50, cifra que experimentou un crecemento similar ao dos últimos tres meses no ano 2020 (82).
