Intelixencia artificial no Chuac para predicir risco de sufrir un ictus
Investigadores defenden que "é unha ferramenta e non un rival" para os clínicos, que "vai facilitar o seu labor" porque poderán "tomar decisións máis rápido".
Por Europa Press / Redacción | SANTIAGO DE COMPOSTELA | 26/12/2021 | Actualizada ás 13:01
Investigadores do Instituto de Investigación Biomédica da Coruña (Inibic), en colaboración co Servizo de Neuroloxía do complexo hospitalario coruñés (Chuac), traballan nun proxecto de intelixencia artificial (IA) para "predicir ou estimar o risco" dun paciente que tivo un accidente cerebrovascular, como un ictus, de "que volva sufrir outro".
Así o explicou, nunha entrevista a Europa Press o profesor da Universidade da Coruña (UDC) e responsable do Grupo de Investigación VARPA de Intelixencia Artificial do Inibic, Marcos Ortega Hortas, quen concretou que traballan con imaxe médica en colaboración con Neuroloxía do Chuac no marco do que, a través de imaxes de fondo de ollo, "sen proceso invasivo", poder "predicir ou estimar o risco" dun paciente a sufrir de novo un accidente cerebrovascular, como un ictus.
Deste xeito, a través da aplicación da intelixencia artificial, coa xestión de datos traballan na posibilidade a través desa imaxe de fondo de ollo estimar se un paciente que sufriu un ictus "ten ou non" risco a sufrir outro.
En concreto, colaboran nunha "ferramenta automatizada" para colaborar co persoal clínico en "predicir o risco de que un paciente poida sufrir un ictus". Isto serve, destacou, "para facer un seguimento máis personalizado". Marcos Ortega puntualizou que este proxecto con aplicación da intelixencia artificial atópase "en fase de investigación e desenvolvemento". En concreto, céntranse en que "o sistema aprenda ese nivel de risco".
Os investigadores esperan "uns resultados ao longo do ano que vén", ha indica Ortega Hortas, quen puntualizou que se trata de "investigacións lentas". Con todo, valorou que os resultados que consigan "permitirán mellorar o tratamento".
O investigador do Inibic que lidera este proxecto en colaboración co Servizo de Neuroloxía do Chuac incidiu en que este supón un proxecto "pioneiro", no que colabora cunha especialista destacada como a doutora Mar Casteláns, xefa de servizo do mesmo e responsable da Unidade de Ictus.
"A intelixencia artificial é algo ao que imos ter que ir adoitando á súa presenza en diferentes ámbitos, sobre todo na saúde", sostivo. Ademais, incidiu na importancia de que o persoal clínico "entenda que é unha ferramenta para eles" e non "un rival" porque, matizou, "unha máquina nunca vai substituír ao especialista", senón que "vai facilitar o seu labor" porque poderá, concluíu, "tomar decisións máis rápido". "O experto é o humano", sentenciou.
APLICACIÓN POLA COVID
Os investigador Marcos Ortega Hortas reivindicou o uso da intelixencia artificial no ámbito da saúde porque axuda a "automatizar algunhas tarefas para aliviar carga de traballo" e permite "tomar decisións no diagnóstico e seguimento de pacientes de forma máis fácil, máis cómoda e obxectiva". "Sérvelles como ferramenta de apoio", apostilou.
Respecto diso, resaltou o seu uso con motivo da pandemia, xa que o ano pasado desenvolveron unha ferramenta con intelixencia artificial para, mediante radiografías de pulmón, poder determinar risco de padecer Covid. "É unha ferramenta para facilitar a toma de decisións", abundou.
Tamén aplicaron a intelixencia artificial para reducir a marxe de obter un falso negativo nunha PCR. Así, co Servizo de Microbioloxía desenvolveron unha ferramenta con IA para "mellorar a detección e evitar que se puidese escapar algún positivo".
Todos estes proxectos relacionados coa Covid-19 comezáronos en marzo de 2020, en pleno inicio da pandemia, e tras "cinco-seis meses" expuxeron probas de pilotaxe no Chuac, tras o que obtiveron "uns primeiros resultados válidos". Con todo, matizou que as técnicas foronse "refinando e mellorando".
