Piden o cesamento da secretaria de Política Social por "incompetencia e deixadez"

Novas mobilizacións entre os traballadores dependentes da Consellería de Política Social. O Comité de Empresa da consellería, composto pola CIG, CCOO, CSIF, UGT e CUT, vén de aprobar por unanimidade nun pleno a petición do "cesamento inmediato" da Secretaria Xeral da amentada consellería, María Francisca Gómez Santos.

Dende a fronte sindical expoñen unha serie de razóns para esixir este cesamento. Destacan, por un lado, o continuo ninguneo ao propio comité, ao que tería ofrecido "falsas promesas e só boas palabras que na práctica xamais se cumplen". Neste aspecto, cifran a suposta promesa da secretaria de revisar o protocolo de preparación da medicación na quenda de noite por parte das enfermeiras e auxiliares de enfermería na Residencia Mixta de Ferrol, circunstancia que segundo apuntan non se tería feito.

"A Consellería non é quén de xestionar este problema co SERGAS, responsable da preparación dos medicamentos por persoal cualificado para tal", destacan. A esta cuestión suman o "alarmante aumento do número de baixas laborais", que se dan "nuns cadros de persoal cansos e avellentados; con moito persoal con adaptacións de postos aos que a secretaria xeral se nega a reforzar, causando un sobretraballo e estrés laboral no resto de traballadoras en quenda".

"DEIXADEZ E INCOMPETENCIA"

Outra promesa "incumprida" era a de "recuperar o dereito ao comedor" substraído do Convenio Colectivo, de forma unilateral e "sen ningunha negociación coa parte social", tamén dende o ano 2013. Dende o comité aseguran que en plena pandemia persoal desplazado do seu domicilio "non tiña nin onde ir xantar co peche da hosteleria". A secretaria xeral non posibilita de nengun xeito recuperar este dereito.

"Entendemos dende este Comité de Empresa que todo o exposto supón unha nova baixada da calidade asistencial ,o que demostra unha vez máis o desprezo tanto ao seu persoal como aos residentes, causado pola incompetencia e a deixadez da responsable máxima de xestionar estes problemas e darlles solucións".  Por iso demandan o cesamento deste alto cargo da Xunta, que "mantén unha absoluta deixación das súas funcións e competencias profesionais".