As mortes en residencias galegas desde o comezo da pandemia suman 827
Así consta no último informe actualizado a semana pasada polo Instituto de Maiores e Servizos Sociais con datos ata o 27 de marzo.
Por Europa Press / Redacción | SANTIAGO DE COMPOSTELA | 04/04/2022 | Actualizada ás 16:31
Galicia rexistrou 827 falecementos de residentes con Covid-19 confirmado por Proba Diagnóstica de Infección Activa (PDIA) desde o inicio da pandemia o 14 de marzo de 2020 ata o pasado 27 de marzo de 2022.
Así consta no último informe actualizado a semana pasada polo Instituto de Maiores e Servizos Sociais (Imserso) con datos ata o 27 de marzo, recollido por Europa Press, que reflicte que na semana do 21 ao 27 do mes pasado se rexistraron tres óbitos na Comunidade galega en residencias de maiores.
Desde o 14 de marzo de 2020 ata a data do informe --que se elabora cos datos agregados remitidos polas comunidades autónomas ao Imserso sobre a situación dos centros residenciais do seu territorio, tanto de maiores, como para persoas con discapacidade e outros aloxamentos permanentes de servizos sociais dirixidos aos colectivos anteriores--, en España faleceron con Covid en centros de maiores 22.335 usuarios, 41 deles na semana do 21 ao 27 de marzo.
No conxunto de residencias de Galicia, na semana do 21 ao 27 de marzo rexistráronse 427 usuarios con Covid-19 confirmados por PDIA nun total de 40 centros. No conxunto de España ascenden a 3.627 en 535 instalacións. Do total de Galicia, 384 casos de Covid-19 corresponden a usuarios de 35 residencias de maiores nesa semana, que desde o 14 de marzo de 2020 suman 10.669 persoas con esta enfermidade.
