Rouban máis de 700 metros de cobre de dous parques eólicos nas Pontes e Cedeira

A Garda Civil detivo a dous veciños da localidade coruñesa de Cariño como presuntos autores de tres delitos de roubo con forza nas cousas de diverso material, como cable de cobre, nas instalacións dos parques eólicos das Pontes e Cedeira.

Segundo informou o Instituto Armado, os feitos ocorreron tras recibirse dúas denuncias nos postos da Garda Civil de Cedeira e As Pontes, pola comisión de senllos roubos de mangueira de cable de cobre da instalación eléctrica de aeroxeradores situados en parque eólicos da comarca.

Tras iso, a Garda Civil iniciou unha investigación pola comisión destes delitos contra o patrimonio e pescudou que os autores dos feitos accederan ao interior dos aeroxeradores tras forzar a porta de entrada, para posteriormente e con coñecementos do funcionamento interno dos mesmos, "desconectar da corrente eléctrica unha fase da máquina e conectala a outra fase, mentres cunha serra tipo radial cortaban a mangueira de cable".

A Garda Civil centrou as súas investigacións en dous individuos que foron interceptados nun dispositivo preventivo de seguridade cidadá cando circulaban nun turismo na demarcación de San Sadurniño. Así, inspeccionado o interior do vehículo os efectivos da Benemérita acharon no seu interior 720 metros de cable de cobre e diversa ferramenta para o seu corte, dúas serras tipo radial, discos de repostos, unha serra de ferro, unha pata de cabra ademais doutros efectos.

Posteriormente, a Garda Civil comprobou que o material fora subtraído dun aeroxerador instalado no parque eólico Caxado, situado nas Pontes, valorada a reposición do mesmo polos responsables do parque, nuns 15.000 euros. Nesta operativo participaron o Equipo ROCA da Garda Civil de Ferrol e o Posto da Garda Civil de San Sadurniño, coa colaboración de persoal do Destacamento da Garda Civil de Tráfico de Ferrol.

O Instituto Armado procedeu á detención dos dous autores do roubo e, tras a continuación da investigación, púidose probar a súa participación noutros dous feitos idénticos ocorridos en dous parques eólicos das Pontes e Cedeira, con prexuízos económicos similares ao anterior. Por iso, realizáronse dilixencias para o Xulgado de Instrución de Ortigueira e Fiscalía de Área de Ferrol.

Aeroxeradores do Parque eólico de Tronceda, na Serra do Xistral, na comarca de Terra Cha, en Mondoñedo, en Lugo.. Carlos Castro - Europa Press