A Xunta acusa ao Goberno de "desmantelar" o transporte público no rural galego

A conselleira de Infraestruturas e Mobilidade, Ethel Vázquez, cualificou de "despropósito" o novo mapa de transporte público por autobús que prepara o Goberno central, polo que pediu unha "rectificación" para que teña en conta as "peculiaridades" de Galicia.

En declaracións aos medios de comunicación tras visitar o inicio das obras de mellora da estrada de Valladares, en Vigo, Vázquez lamentou que a proposta do Executivo de Pedro Sánchez para o mapa de transporte en autobús "afonda no abandono do rural" xa que "elimina paradas, suprime servizos e obriga a facer transbordos en liñas de longo percorrido". Precisamente o mesmo que veñen denunciando diversas asociacións a respecto das liñas que dependen da Xunta. 

En concreto, indicou que a eliminación de paradas de autobús afectará a máis de 20 concellos galegos, onde viven máis de 136.000 persoas. Ademais, eliminaranse máis de 75 servizos, afectando a municipios como Lalín, Tui, O Porriño, Palas de Rei ou Melide, entre outros moitos.

A titular de Mobilidade lamentou que o Goberno "desmantele" o transporte público do rural, non só con este mapa de transporte por autobús, senón tamén coa redución do servizo de trens de media distancia.

Por iso, os responsables autonómicos reuníronse hai uns días co Ministerio de Transportes, Mobilidade e Axenda Urbana para trasladarlles estas peticións e que non se elimine ningunha das paradas, sen que se lles deu aínda unha resposta de se finalmente rectificarase a proposta inicial ou non.

"Estamos a falar de paradas que están a dar un servizo realmente importante. Estamos a falar de 136.000 galegos. Por exemplo, xustifican que na zona de Allariz, cunha publicación de máis de 6.000 habitantes, como a usan uns 3.000 usuarios pois hai que suprimila. Creo que non son criterios que podamos asumir", sentenciou Ethel Vázquez.

Ethel Vázquez no inicio das obras da estrada de Valladares, en Vigo.. PEDRO DAVILA-EUROPA PRESS | Fonte: Europa Press