GaliciaTIC, foro sobre o sector tecnolóxico, chega á súa vixésima edición
Como novidade, incluirá unha feira de emprego na que participarán 150 alumnos de ciclos tecnolóxicos.
Por E.P. | SANTIAGO DE COMPOSTELA | 12/10/2022 | Actualizada ás 12:01
GaliciaTIC, o foro de referencia para o sector tecnolóxico galego organizado por Ineo, celebrará a súa vixésima edición entre o mércores 19 e o xoves 20 na Cidade da Cultura, baixo o lema 'Crecemento, dixitalización e eficiencia'.
Así, o evento conmemorará 20 anos de traxectoria con dous obxectivos, o primeiro deles abordar e analizar o contexto xeral do proceso de dixitalización, tanto no ámbito galego como internacional, tras a súa aceleración global pola pandemia e fronte aos retos do futuro inmediato derivados da inestabilidade política e o cambio climático.
En segundo lugar, GaliciaTIC terá como meta pór en contacto directo o talento novo, o sistema educativo e o sector tecnolóxico para crear lazos de futuro e fomentar o emprego.
Para todo iso, celebrará na súa vixésima edición un completo programa de conferencias, mesas redondas e seminarios que, como gran novidade, incluirá unha feira de emprego na que participarán máis de 150 alumnos de ciclos tecnolóxicos de centros galegos de Formación Profesional procedentes de Lugo, A Coruña e Vigo.
Deste xeito, GaliciaTIC fomentará un ano máis a relación das tres institucións que conforman a chamada "tripla hélice da innovación": administración, formación académica e empresa.
