A CIG lanza unha campaña de firmas pola igualdade retributiva do profesorado de FP

CIG-Ensino lanzou unha campaña de firmas pola igualdade retributiva do profesorado de Formación Profesional para dar resposta aos colectivos que "quedan descolgados" do proceso de integración no corpo de Profesorado de Educación Secundaria.

Segundo trasladou o sindicato, a campaña busca ter presente a todos os colectivos que, asegura, "a Consellería de Educación relega coas súas declaracións na Mesa Sectorial", achegando "propostas de solución legalmente factibles e que só dependen da vontade política".

Ao mesmo tempo, destacou que a recollida de firmas é unha chamada a "actuar con unidade dentro do profesorado de FP" e a "apoiar masivamente que todos teñan as mesmas retribucións e os mesmos dereitos unha vez que se aplique a integración no corpo de Profesorado de Ensino Secundario aberta coa convocatoria publicada no DOG para aqueles que reúnen os requisitos de titulación fixados polo Ministerio".

Así, a CIG centra as súas reivindicacións en diferentes asuntos: negociar un complemento de equiparación para o profesorado que queda para extinguir no corpo de Profesores Técnicos de FP; o compromiso de pago con carácter retroactivo desde xaneiro de 2021 para os que traballasen como docentes interinos na data da entrada en vigor da Lomloe; e, para o funcionariado que aprobou as oposicións en 2021, un total de 603 persoas, modificar o artigo 16.3 da orde de integración e recoñecer os efectos desde o inicio da fase de prácticas.

Estudantes dun ciclo d FP | Fonte: EP