Renfe alerta a 15.176 usuarios galegos sobre o uso irregular de abonos: ao terceiro aviso haberá sanción

Renfe comezou este mércores a avisar aos usuarios de 15.176 abonos en Galicia por facer un uso irregular dos seus títulos recorrentes, co obxectivo de evitar a súa incorrecta utilización, en especial os comportamentos de determinados usuarios que reservan praza nos trens e logo non viaxan, entre outros.

Para iso, Renfe enviará dous avisos ao titular cando se detecte que finalmente non viaxou sen anular a reserva coa antelación requirida, e á terceira vez que se incorra en uso indebido, procederase a sancionar.

A operadora ferroviaria informou a través dun comunicado que incautará a fianza de 20 euros e anulará o abono gratuíto aos usuarios. Aínda así, establécese un prazo transitorio de 7 días nos que se informará ao viaxeiro do incumprimento sen que este supoña a aplicación da medida.

Ademais, lembraron que entre as novas condicións de uso limítase a catro viaxes diarios de ida ou volta o número máximo de traxectos que se permite formalizar por abono e imposibilitarase formalizar dúas viaxes no mesmo sentido ata que transcorra o triplo do tempo de viaxe programada.

A entidade puxo de relevo que o mal uso dos títulos gratuítos "xera un prexuízo ao resto dos cidadáns limitando a súa mobilidade e desvirtúan a efectividade destes títulos, cuxo obxectivo é incentivar a demanda do transporte público e contribuír a reducir as emisións de CO2".