O alcalde de Vilanova pide colaboración para identificar as persoas que trataron de prender lume á súa casa
Fixo pública este venres a gravación dunha cámara na que se ve a dous individuos lanzando obxectos incendiarios e pide que se difunda "ao máximo".
Por Europa Press / Redacción | PONTEVEDRA | 13/01/2023 | Actualizada ás 15:43
O alcalde de Vilanova de Arousa, Gonzalo Durán, pediu este venres colaboración cidadá para identificar ás dúas persoas que o pasado 13 de setembro lanzaron varios obxectos, entre eles un incendiario, ao seu domicilio.
O rexedor compareceu no salón de plenos do Concello de Vilanova para facer públicas unhas imaxes gravadas ás 5.30 horas desa xornada polas cámaras de seguridade da súa vivenda e nas que poden verse os feitos.
Tal e como mostra a gravación, dúas persoas, un home e unha muller, achéganse á casa do alcalde e lanzan un lastro e unha maceta contra unha vidreira da fachada. Nese momento danse conta de que no piso superior hai unha xanela aberta, polo que se afastan e regresan cinco minutos despois cunha maceta en chamas, que arroxan ao interior da vivenda, tras o cal escapan correndo.
As dúas persoas levaban a cabeza cuberta cunha visera e a cara tapada cunha máscara. A pesar diso, o alcalde considera que "polos seus andares, polos xestos" e, sobre todo, "pola sudadera moi identificativa" que leva a muller, son fáciles de identificar. "Axiña que se divulguen estas imaxes polo pobo, estou seguro de que moitos veciños van saber quen son", indicou Gonzalo Durán tras o visionado público da secuencia.
A pesar de que as imaxes obran no súa poder desde entón, o alcalde decidiu non publicalas antes por petición dos axentes que investigaban os feitos. "A Garda Civil pediume que non as fixese públicas para non entorpecer a investigación. Agora que sei que a investigación está arquivada, quero que as vexa todo o mundo", resolveu.
COLABORACIÓN CIDADÁ
Gonzalo Durán habilitou unha conta de correo solicitando a colaboración cidadá para identificar os autores do ataque incendiario, á vez que pediu que as imaxes sexan compartidas a través das redes sociais "para que as vexa o máximo posible de xente".
O alcalde remitirá a información obtida a través da colaboración cidadá ás Forzas de Seguridade, co obxectivo de que estas "reabran a investigación, interroguen aos presuntos autores e póñanos a disposición xudicial".
ATAQUE CONTRA O COCHE
Para o alcalde de Vilanova, a quen a pasada semana tentaron tamén queimarlle o coche, todos estes actos son obra de "alguén que ten" contra el "un odio patolóxico".
Respecto dese segundo incidente, Gonzalo Durán explicou que a única información que ten é que a Garda Civil segue investigando os feitos. Deste suceso tamén hai imaxes, gravadas neste caso polas cámaras de seguridade dun establecemento comercial situado en fronte de onde estaba aparcado o coche do rexedor.
