O BNG sinala que "algo teñen que ocultar", ante a negativa da Xunta de informar sobre o que debían abonar as eólicas
O Bloque queren coñecer a información e expedientes de "todos" os proxectos industriais
Por Europa Press / Redacción | SANTIAGO DE COMPOSTELA | 24/01/2023 | Actualizada ás 19:24
O PPdeG rexeitou unha iniciativa do BNG que pedía que a Xunta traslade ao Parlamento galego a documentación sobre os plans industriais e as correspondentes monetarizacions en relación coas cantidades que debían abonar as empresas eólicas por proxectos non realizados do concurso de 2010.
No pleno do Parlamento, o deputado do BNG Luís Bará avisou de que, se persiste a negativa de transparencia por parte do PP, acudirá á xustiza, xa que demanda "luz e taquígrafos". "Non queren dar información porque algo teñen que ocultar", reproba respecto de que hai empresas "que se comprometeron a investir nos proxectos industriais e non o fixeron".
Esta petición chega por mor de que a asociación ecoloxista Adega presentase unha denuncia ante a Fiscalía de Medio Ambiente contra a Xunta por presunta prevaricación e malversación de fondos vinculados coa tramitación do plan industrial para o desenvolvemento de dous proxectos eólicos de Greenalia --de Campelo e Lamas de Feás--.
E é que o Bloque queren coñecer a información e expedientes de "todos" os proxectos industriais --cifra en 21 as empresas que pediron esa monetarización--, xa que por parte do Goberno galego "perdoaron" 11,7 millóns a Greenalia en relación con esta cuestión. A proposta rexeitada tamén pedía investigar este extremo.
Así mesmo, o deputado nacionalista denunciou "a avalancha" e "invasión" de ocupación eólica "masiva" do territorio, promovida por Xunta e Goberno central. E é que sinala que, entre ambas as administracións, hai 275 proxectos en tramitación que suman máis de 11.000 megawatts, aos que se suman outros 6.000 megawatts previstos de eólica mariña, "unha auténtica animalada". "Non queren deixar nada vivo, nin sequera os peixes", censura.
Así, Bará considera que se trata de "un atentado contra Galicia", "o maior atentado contra o rural galego desde o franquismo", aínda que lembra que xa hai denuncias pola vía penal. A deputada socialista Begoña Rodríguez Rumbo coincide en demandar á Cámara que se achegue esta documentación, á vez que pide "depurar responsabilidades políticas" sobre o sucedido cos parques eólicos de Greenalia "no caso de que houbese algún tipo de responsabilidade".
POSTURA DO PP
En cambio, Marta Nóvoa (PP) defende que todos os acordos e resolucións do Goberno galego sobre o concurso eólico de 2010 "cumpren estritamente coa legalidade". Reprocha que esta iniciativa o "único que pretende é deostar a enerxía eólica" e "falar mal da Xunta".
Ademais, a deputada popular cargou contra a "decisión unilateral" do Goberno central de pór unha data límite esta semana para a presentación de declaracións ambientais para proxectos eólicos, o que provocou unha "avalancha", con perda dos permisos de conexión para aqueles que non conseguiron unha autorización en prazo.
