Publicada a contratación de máis de 300 prazas en centros de día públicos de alzhéimer

O Diario Oficial de Galicia publicou esta semana a asignación en réxime de concerto social de 314 prazas en centros de atención diúrna de alzhéimer de titularidade autonómica.

Segundo explica o Goberno autonómico nun comunicado, destínase un orzamento de 18,5 millóns de euros, o que permitirá empregar por primeira vez esta modalidade de contratación que garanta a estabilidade na prestación do servizo.

Estes concertos terán unha duración inicial de catro anos e poderán renovarse ata alcanzar un máximo de dez. En concreto, este instrumento do concerto social aplicarase nas prazas de atención diúrna ás persoas con alzhéimer e outras demencias neurodexenerativas que a Xunta ten en Ferrol, Ribeira, Lugo, Viveiro, Ourense, Moaña, Pontevedra e Vigo.

Trátase, detallan, de garantir a estabilidade tanto para estas entidades como para as persoas usuarias destes servizos, pois esta concertación directa "supón unha continuidade na prestación do servizo actual, o que se traduce nunha atención de calidade e centrada no usuario".

A conselleira de Política Social e Xuventude, Fabiola García, no centro de día de atención á discapacidade do Concello de Valga | Fonte: Xunta de Galicia