Mobilidade e acceso á vivenda, os grandes retos de Bugallo nas municipais en Santiago
Mostrouse, ante o inicio da campaña electoral este venres, "cada día máis ilusionado" con "o equipo que lle rodea".
Por E.P. | SANTIAGO DE COMPOSTELA | 08/05/2023 | Actualizada ás 16:47
O actual alcalde de Santiago e candidato socialistas ás municipais do próximo 28 de maio, Xosé Sánchez Bugallo, apuntou á mobilidade, o acceso á vivenda ou a creación de oportunidades para a xente nova como algúns dos grandes retos de cara ao futuro.
Nun almorzo informativo cos medio de comunicación, Sánchez Bugallo apuntou que Santiago é a cidade galega "con máis emprego e menos paro", pero que conta cunha poboación "moi formada" que "non atopa un traballo adecuado á súa formación".
Por iso, fixo fincapé en ofrecer á xente nova "oportunidades en materia de emprego e de vivenda". Así, propuxo a recuperación da empresa municipal de vivenda e chan, Emuvissa, co obxectivo de "planificar e promover chan para a construción de vivendas protexidas".
En materia de vivenda, Sánchez Bugallo referiuse tamén á situación na zona vella na que "hai que facer fronte á nova realidade da demanda das familias", xa que a día de hoxe "o tamaño é de dúas persoas". Ademais, o alcalde indicou que a concesión do servizo municipal de auga e saneamento será "un tema primordial nos próximos anos".
MATERIA DE MOBILIDADE
Deste xeito, o candidato socialista remarcou que o gran reto é a mobilidade, xa que "se require un cambio de hábitos e de decisións valentes". Sánchez Bugallo referiuse ao novo contrato urbano que "dá a oportunidade de integrar todo o rural" e "a todo o termo municipal". Tamén lembrou que "se porá transporte a demanda" nas zonas "onde non haxa masa crítica".
Así mesmo, apelou a "superar barreiras" e "formar un tecido urbano compacto, un todo continuo" zonas como o Castiñeiro, Pontepedriña, Conxo ou o Ensache, algo que "obriga a repensar moitas cousas". Un reto que, en palabras de Bugallo, "tamén hai que afrontalo no ámbito rural".
CAMPAÑA ELECTORAL
Doutra banda, o candidato socialista á alcaldía mostrouse, ante o inicio da campaña electoral este venres, "cada día máis ilusionado co equipo que o rodea". Sobre o resto de candidatos, Sánchez Bugallo indicou que os resultados dos gobernos do PP --entre 2011 e 2015-- e Compostela Aberta --2015 a 2019-- "están á vista". Sobre o BNG sinalou que "se compartiu goberno 12 anos e agora parece que ten amnesia".
