A maioría das familias con persoas con discapacidade recortou gastos en 2022 e case o 40% non pode aforrar
Facer fronte a tratamentos, medicamentos e terapias son algunhas das cousas que máis esforzo supoñen para as familias, con máis problemas para sufragar cuestións como dietas especializadas ou actividades especiais.
Por E.P. | SANTIAGO DE COMPOSTELA | 08/05/2023 | Actualizada ás 18:41
O 80% das familias galegas con integrantes que padecen algunha discapacidade recoñece que tivo que recortar gastos no último ano ante o encarecemento da vida e o 38,4% ten nula capacidade de aforro, segundo un estudo elaborado por Adecco.
O informe sinala que os sobrecustos derivados da inflación incrementou entre 150 e 6.000 euros os gastos destas familias, que deben facer fronte a desembolsos adicionais asociados á discapacidade de ata 30.000 euros.
A enquisa realizada pola compañía de recursos humanos sinala que o 62,5% das familias galegas con persoas con discapacidade ao seu cargo recortou gastos non esenciais (lecer, compras ou vacacións) e o 17,6% viuse obrigado a facelo en vivenda, subministracións ou alimentos.
Ademais, o 38,4% dos fogares galegos admite que actualmente ten nula capacidade de aforro e, entre aqueles que si o conseguen, a maior parte non pode facelo en máis de 300 euros.
De feito, o 15,6% admite non chegar a fin de mes e case a metade (47,9%) faino con dificultade. Un 75% declara non poder afrontar gastos imprevistos e un 60% teme non poder manter gastos vinculados á discapacidade (terapias, asistencia, etc.) durante o próximo exercicio.
Facer fronte a tratamentos, medicamentos e terapias son algunhas das cousas que máis esforzo supoñen para as familias, que mostran máis problemas para sufragar cuestións como dietas especializadas ou actividades especiais.
