Quen ten que debatir en Galicia nas eleccións do 23X?

O Partido Popular de Galicia considerou que a proposta de debate entre líderes autonómicos de cara ao 23X realizada pola portavoz nacional do BNG, Ana Pontón, é un "síntoma de debilidade" mentres que o PSdeG preguntouse se a nacionalista busca "ocultar" ao que foi o seu deputado no Congreso durante a última lexislatura, Néstor Rego.

A líder dos nacionalistas galegos expuxo o domingo a celebración dun debate electoral ao máximo nivel entre as principais forzas políticas galegas para explicarlle á cidadanía cales son as "alternativas para defender os intereses de Galicia no Congreso e no Senado".

Sobre esta proposta, o presidente da Xunta e do PP galego, Alfonso Rueda, xulgou que a portavoz nacional do BNG, Ana Pontón, está "moi necesitada dalgún tipo de proxección" e rexeitou debater con ela e co líder socialista no marco da campaña electoral para o 23 de xullo.

Así, atribúe a esa situación a proposta da dirixente nacionalista, afirmou que desde 2008 --cando si debateron os líderes do tres partidos con motivo das xerais-- "cambiaron moitas cousas" e cre que o BNG pretende tapar á cabeza de lista pola Coruña, Néstor Rego, que foi o único deputado nacionalista na lexislatura que agora termina.

Ademais, a preguntas dos xornalistas en Bergondo (A Coruña), Rueda ironizou coas "expectativas enormes" que marcou a líder do BNG cando se coñeceu a convocatoria de eleccións, o que tamén motiva, ao seu xuízo, a petición de debate. Así, subliñou que a líder do Bloque xa despois "rebaixou" estas expectativas de grupo propio a "importante"

Preguntado respecto diso nunha rolda de prensa ofrecida este luns na Cámara galega, o portavoz parlamentario do PPdeG, Pedro Puy, tamén ostivo que lle parece un "síntoma de debilidade" do BNG de cara a esta cita coas urnas.

PSdeG

Pola súa banda, tras deixar claro que o PSdeG "participou e participará" en todos os debates que se convoquen, o portavoz parlamentario dos socialistas galegos, Luís Álvarez, incidiu en que este existirá "se quere o PP que exista".

Dito isto e sobre os participantes nesa cita, Álvarez lembrou que nin a líder do Bloque, Ana Pontón, nin o presidente do PP e da Xunta, Alfonso Rueda, nin o secretario xeral do PSdeG, Valentín González Formoso, son candidatos nestas eleccións do 23 de xullo.

Ante iso, preguntouse se o que busca a dirixente do Bloque é "ocultar a algún candidato" da súa formación e, en particular, "se hai algún problema con que o señor Néstor Rego fose o que participase nese debate".