A Xunta destaca que o 80% da poboación galega ten una vía de alta capacidade a 15 minutos
Ethel Vázquez sitúa a cohesión social e a vertebración territorial como claves nas infraestruturas galegas
Por E.P. | A CORUÑA | 04/07/2023 | Actualizada ás 13:47
A conselleira de Infraestruturas e Mobilidade, Ethel Vázquez, explicou que os proxectos promovidos pola Xunta van encamiñados a alcanzar unha comunidade "cohesionada desde o punto de vista social, vertebrada no territorial e pensando nos obxectivos de desenvolvemento sustentable e responsable".
Así o manifestou durante a súa intervención, este martes, no almorzo informativo organizado por Executive Forum España, celebrado na Coruña, onde situou a "dispersión" como un criterio crave nas infraestruturas galegas, así como "ter presente a diversidade territorial apostando polo equilibrio e pensando no rural". "O 80% da poboación está a menos de 15 minutos dunha vía de alta capacidade en Galicia", recalcou.
No acto, que foi retransmitido en directo, Vázquez insistiu tamén en que a Xunta executa un modelo de infraestruturas "pensando como hai que xestionalas" e aplica "alternativas eficaces para a mobilidade sustentable". "As decisións dos gobernos en infraestruturas teñen transcendencia no futuro e nestes 14 últimos anos co noso modelo fixemos política económica, social e ambiental", engadiu.
No seu discurso, Ethel Vázquez criticou que na avenida de Alfonso Molina da cidade herculina "a día de hoxe non hai obras" e a "A6, unha autovía fundamental, está cortada desde hai un ano e estarao un ano máis".
Do mesmo xeito, afeou a actitude do Goberno central ante infraestruturas "especialmente prioritarias para a Xunta" como a "planificación completa e urxente da liña ferroviaria entre A Coruña-Ferrol e A Coruña-Lugo e conectar Galicia con Portugal. "Son unhas listas de demandas que fai moito que están redactadas e o próximo goberno, a partir das eleccións xerais do 23 de xullo, teraas encima da mesa", concluíu.
