Rueda sobre a detención de Marcial Dorado na Operación Nécora: "Informábame igual que todo o mundo"
Feijóo dixo este mércores que descoñecía a vinculación de Dorado co narcotráfico porque entón "non había Internet, nin Google".
- Outra "mentira" de Feijóo sobre Marcial Dorado?
- Feijóo defende a súa relación con Marcial Dorado: "Naquel momento non tiña ningunha acusación"
Por Europa Press / Redacción | Compostela | 20/07/2023 | Actualizada ás 16:24
As imaxes do candidato do PP á Moncloa, Alberto Núñez Feijóo, con Marcial Dorado, que datan de mediados dos anos 90, cobraron protagonismo co impulso dos seus rivais políticos na última semana da campaña e despois de que este mércores o dirixente popular reiterase que non coñecía os negocios de Dorado porque --alegou-- entón "non había nin internet nin Google".
Este xoves, ao termo da reunión semanal do Executivo autonómico, o seu sucesor en Galicia, Alfonso Rueda, foi preguntado acerca de se cre que esa relación con Dorado, quen acabou condenado por narcotráfico, pode pasar factura ao seu xefe de filas, e se el coñecía as informacións publicadas nos 90 sobre o narcotráfico.
En concreto, foi preguntado por unha das principais operacións históricas contra o tráfico de drogas en Galicia, a 'Operación Nécora', que tivo lugar no ano 1990 e na que xa foi detido Dorado, aínda que non sería condenado por narcotráfico ata máis dunha década despois.
"COÑECÍA AS MESMAS NOTICIAS QUE TODO O MUNDO"
Tras recalcar as boas expectativas electorais que ten para o PP e Feijóo, o presidente galego rememorou que na época da 'Nécora' el "acababa de terminar a carreira" e que "en xeral" neste asunto e "todo" o resto informábase "igual que todo o mundo". "Coñecín as mesmas noticias que todo o mundo", resolveu.
