O Concello de Santiago alugará 10 buses urbanos ante a falta de vehículos para cumprir o servizo

O pleno do Concello de Santiago aprobou os expedientes de crédito necesarios para proceder ao aluguer de 10 novos autobuses que darán servizo na rede do transporte urbano ata que se poida finalizar a licitación do novo contrato do transporte público.

En concreto, a medida contou co voto a favor das formacións que integran o goberno local -BNG e Compostela Aberta-, así como do Partido Socialista, mentres que o Partido Popular optou pola abstención.

En concreto, trátase dun expediente de crédito extraordinario de 124.993 euros para a incorporación de 10 autobuses urbanos para os meses de novembro e decembro, cun custo por vehículo e mes de 6.249,65 (IVE incluído); e doutro de suplemento de crédito de 387.818 euros.

No debate, a rexedora, a nacionalista Goretti Sanmartín, asegurou que "todo o mundo sabe" que o estado do transporte colectivo na cidade non só "non é óptimo" senón que "é malo". "Vimos de momentos nos que non se procedeu a esa renovación da concesión e temos un problema herdado complicado ao que hai que dar resposta", sostivo.

A alcaldesa sostivo que este asunto se trata de "unha prioridade máxima" do goberno local, que avoga por atopar solucións "de forma legal" e "de acordo co que din os servizos xurídicos". E é que, na sesión plenaria, o concelleiro do Partido Popular Adrián Vila coincidiu en que a situación do transporte urbano na cidade é "insostible", cos "autobuses caendo a anacos", pero mostrouse en desacordo co procedemento.

"Ter 21 autobuses de aluguer e gastar 1,5 millóns de euros, non nos parece serio, habería que buscar outras solucións", afirmou o edil popular, que criticou que o goberno local aposte por "un aluguer" que vai custar " moito diñeiro". "O que poderían facer é adquirir eses autobuses e despois reformular o contrato", asegurou para sinalar que se esta medida pódese levar a cabo en Ourense, poderíase levar a cabo noutras cidades como Santiago.

Respecto diso, o edil de Compostela Aberta Xan Duro censurou a proposta do concelleiro do PP ao asegurar que "ou non coñece a lexislación ou fai por non coñecela". "Hai unha lei de competencia e o concello non pode decidir a que empresa compra autobuses", afirmou nunha intervención que lembrou tamén que o concello ten "un límite de débeda" que debe de cumprir e que un autobús eléctrico costa máis de medio millón de euros. "Este goberno fai o que ten que facer, buscar alternativas e dalle solución aos problemas", manifestou.

Pola súa banda, a concelleira socialista Marta Abal lembroulle aos populares que "os autobuses non se fan vellos de súpeto" e que no ano 2015, durante o mandato do PP, "houbo unha oportunidade importante para proceder á renovación" de flótaa pero "non se fixo uso desta posibilidade".

OUTRAS APROBACIÓNS

Ademais, na sesión plenaria, aprobouse por unanimidade e sen debate tras o acordo da xunta de portavoces, unha subvención nominativa a favor de Cruz Vermella por importe de 100.000 euros con base na axuda concedida pola Deputación da Coruña no marco do programa POS+ Adicional 1/2023 para gastos sociais extraordinarios do exercicio 2023.

Tamén se acordou a aprobación dun segundo expediente de suplemento de crédito por un importe de 387.818 euros destinados a financiar a subministración de combustibles e carburantes das dependencias municipais da UMAD (20.000 euros) e dos Servizos Sociais (35.000 euros), ambas co obxectivo de facer fronte ao incremento do gas natural.

Este expediente tamén inclúe un suplemento de crédito de 75.000 euros para establecer unha liña de axudas destinada á adquisición de bens de consumo no comercio e na hostalaría mediante a concesión de bonos de consumo.