Avanza a actualización do rexistro de viñedos de Galicia, co sector preocupado polo abandono de hectáreas

A Xunta traballa na actualización do rexistro vitícola de Galicia para coñecer da forma máis concreta a realidade da superficie de viñedo na comunidade. No proceso trabállase coa preocupación do sector centrada na substitución xeracional e na "sangría" de hectáreas abandonadas por "falta de rendibilidade", en palabras do presidente do Consello Regulador da Denominación de Orixe (DO) Ribeiro, Juan Manuel Casares Gándara.

Casares Gándara atendeu aos medios, do mesmo xeito que o conselleiro do Medio Rural, José González, antes de participar nunha reunión na que tamén estiveron presentes representantes das DO Monterrei, Valdeorras, Rías Baixas, e Ribeira Sacra. O conselleiro remarcou que se traballa co fin de actualizar e coordinar a información que existe, en forma de base de datos, no devandito rexistro, coa capa gráfica do Sistema de Información Xeográfica de Parcelas Agrícolas (o Sixpac), que é o sistema de identificación de parcelas agrarias a efectos da xestión e control dos réximes de axuda baseados en superficies.

O obxectivo, defendeu González, é lograr que a realidade documentada se corresponda coa realidade física, "a que existe sobre o territorio". Para iso, cóntase coa colaboración da Axencia para a Modernización Tecnolóxica de Galicia (Amtega), que desenvolveu tecnoloxías de intelixencia artificial. Ditas ferramentas van permitir dispor dun sistema capaz de diferenciar entre terras ocupadas por viñedos e aquelas que non o están. "É dicir, coñecer con precisión a superficie de viñedo", remarcou.

LISTO PARA A VENDIMA DE 2024

O conselleiro explicou que a finalidade última destas actuacións é facilitar a planificación das diferentes políticas de impulso ao sector do viño, así como profundar na mellora da súa competitividade e asegurar un crecemento ordenado das plantacións de vide. Ao tempo, búscase tamén adecuar e harmonizar a normativa autonómica coa comunitaria e estatal. A tal fin, a Xunta está a elaborar o futuro decreto polo que se regula o potencial de produción vitivinícola de Galicia e que se atopa actualmente en período de consulta aberta.

Precisamente, o seguinte paso neste traballo de actualización será someter a exposición pública a información dispoñible do rexistro, algo que está previsto para os primeiros meses do próximo ano, coa vista posta en ter perfectamente perfilado e finalizado o traballo de face á vendima de 2024.

Con respecto á utilidade do rexistro na toma de decisións, o conselleiro puxo en valor que a planificación estratéxica é unha "marca da casa" na Consellería de Medio Rural, como así se puxo de manifesto (incide a Xunta) coas estratexias do viño, do leite, da carne ou do sector forestal que están en marcha.

O PROBLEMA DO ABANDONO

Pola súa banda, Casares Gándara celebrou a reunión e que se traballe na procura de dar "unha foto real" da situación do sector, debido a que o rexistro "levaba case 30 anos sen actualizar". De feito, indicou que a súa denominación de orixe emprendeu labores deste tipo na súa área e os resultados reflectiron que tanto o número de hectáreas produtivas como o de viticultores rexistrados é moi inferior ao que reflectían os últimos datos dos que se dispuña.

Neste sentido, advertiu que só "cunha foto real" se pode "traballar de forma eficiente", e incidiu no que definiu como "a súa mantra": "No Ribeiro hai unha sangría, unha sangría de hectáreas por abandono, por falta de rendibilidade". "Necesitamos terreo produtivo, de aí a que aplaudamos tamén a iniciativa dos polígonos agrarios", engadiu, antes de incidir que ao sector tamén lle preocupa a substitución xeracional e poder contar con man de obra. Os problemas que aburan á súa área son compartidos, indicou, por outras denominacións de orixe "irmás".

Finalmente, en canto á previsión que ten para a vendima deste ano, asegurou que a estimación é similar ao do ano pasado, cando se superaron o dez millóns de quilos de uva, aínda que haberá que esperar a que se materialice para coñecer os resultados definitivos.

Participantes na reunión para a actualización do rexistro vitícola | Fonte: Xunta de Galicia