As Xornadas de Patrimonio Natural porán o foco nos efectos dos parques eólicos mariños

As Xornadas Galegas de Patrimonio Natural e Biodiversidade terán lugar o sábado 25 e domingo 26 de novembro na Escola de Enxeñaría Forestal do Campus de Pontevedra, cun programa protagonizado por un conxunto de coloquios que permitirán profundizar en problemáticas ambientais actuais. Entre outras cuestións, as xornadas porán o foco nos efectos dos parques eólicos mariños, na conservación de especies vulnerables ou protexidas, no impacto dos gatos na biodiversidade de determinadas zonas e na adaptación das masas forestais para os efectos do cambio climático. Juan Picos, director da Escola de Enxeñaría Forestal, destacou que "para a Escola é unha alegría recibir unha actividade que sempre atrae moito público" e sinalou que a SGHN é unha "entidade de referencia", que cumpre 50 anos neste 2023. 

As xornadas teñen entrada libre, previa inscrición, e arrincarán o sábado 25 cun programa integrado por nove conferencias, trasladándose o domingo ao Museo de Pontevedra, onde, ás 11,30 horas, terá lugar a proxección do documental 'Iberia, natureza infinita', que suma nove candidaturas aos premios Goya, xunto cun coloquio co seu director, Arturo Menor.

Parque eólico mariño | Fonte: ECOLOXISTAS EN ACCIÓN