O custo de ter un traballador sobe case un 5% en Galicia a 2.619 euros ao mes

O custo laboral medio por traballador e mes (que inclúe as remuneracións e as cotizacións sociais) subiu un 4,9% en Galicia no terceiro trimestre en relación ao mesmo período do 2022, ata un total de 2.618,75 euros, segundo informou o Instituto Nacional de Estatística (INE) este luns.

Este incremento é similar ao aumento do 5% da media española. Galicia ocupa o décimo posto entre autonomías na suba. A cifra galega está 274 euros por baixo da media española, que se eleva a 2.892,73 euros, o dato no país máis alto nun terceiro trimestre en 23 anos (desde 2000).

O custo laboral de Galicia é o noveno máis alto. A cifra máis elevada, do País Vasco (3.411,36 euros), está 792,6 euros ao mes por encima do dato galego. Do total do custo laboral, o custo salarial (que comprende todas as remuneracións, tanto en metálico como en especie) alcanzou os 1.901,15 euros de media en Galicia no terceiro trimestre do ano, un 3,6% máis que no mesmo período de 2022, inferior ao avance medio do 4,2%.

Pola súa banda, de xullo a setembro, outros custos (non salariais) creceron un 8,4%, ata os 717,60 euros, neste caso por encima do país (7,2%). No terceiro trimestre do ano, as horas pactadas por traballador e mes foron 154,6 en Galicia, máis que as 153,4 horas da media española. As horas efectivamente traballadas foron 124,3 (tamén máis que as 121,5 horas de España) e as non traballadas foron 34,5, menos que as 36,8 da media.

As VACANTES SOBEN UN 4%

Pola súa banda, Galicia conta con 6.150 vacantes no terceiro trimestre, que crecen un 4%. É a sétima comunidade na que máis se elevan as vacantes. En España, o número de vacantes alcanzou as 155.797 no terceiro trimestre, a cifra máis alta desde o ano 2013, cando hastas comezaron a contabilizarse. O 90,2% das vacantes atópanse no sector servizos.