Ata 3.000 toneladas anuais de materia orgánica poderá procesar a planta de biorresiduos de Verín para facer compost

A planta de biorresiduos de Verín empezará nos próximos días a dar servizo a municipios da provincia de Ourense. A Xunta estima que poderá tratar 3.000 toneladas da materia orgánica que se refuga en municipios ourensáns e 1.600 toneladas de estructurante, o que suporía 1.500 toneladas ao ano de compost.

Segundo explicou este martes a vicepresidenta segunda e conselleira de Medio Ambiente, Territorio e Vivenda, Ángeles Vázquez, a Xunta investiu seis millóns de euros na posta en marcha da planta. "O obxectivo é apoiar aos municipios no cumprimento da normativa europea que establece que deben ter implementada a recollida diferenciada da materia orgánica a través do quinto colector antes do 31 de decembro de 2023", expuxo a conselleira durante a visita ás instalacións, acompañada do delegado da Xunta en Ourense, Gabriel Alén.

Así mesmo, a conselleira referiuse aos fogares, nos que se debe separar para que o compost final non leve ningún "impropio" e sexa de "calidade" para utilizalo nos viñedos, montes ou xardíns dos municipios. A planta de biorresiduos de Verín dará en total, nas próximas semanas, servizo directo a 22 concellos da súa área de influencia (case 50.000 habitantes). Segundo Ángeles Vázquez avanzou, xa nos próximos días a planta recibirá e transformará a materia orgánica producida polas xeradoras dos 13 concellos integrados no servizo de recollida de residuos da Deputación de Ourense.

Ademais, recibirá tamén os residuos das plantas de transferencia de San Cibrao das Viñas (52 municipios con 252.587 habitantes) e A Rúa (18 municipios cunha poboación de 27.389 habitantes). Segundo lembrou a vicepresidenta segunda, esta rede está formada por catro plantas de biorresiduos (unha por provincia), que estarán apoiadas por 13 plantas de transferencia, e cuxa execución corre a cargo de Sogama.

Colectores | Fonte: CONCELLO DE VALÈNCIA - Arquivo