Allariz presume dos seus 'Roteiros temáticos'

A actividade dos Roteiros Temáticos está deseñada para percorrer diferentes puntos e temáticas da historia de Allariz, desde a súa orixe ata a actualidade. A través desta inciativa, a xente que participou este 2023 puido coñecer os segredos e as lendas alaricanas,  curiosidades como as da rodaxe da Lingua das Bolboretas, tempos de guerra, historias de mulleres, o Castelo e moito máis.

Os Roteiros Temáticos dividíronse en 7 temáticas, levándose a cabo en 10 datas os terceiros sábados de cada mes. A primeira foi sábado 18 de marzo e a última o pasado 16 de decembro. Para participar nesta actividade de balde que ofrece o concello había que acudir á oficina de información previa inscrición en información@allariz.gal.

BALANCE EXITOSO

Máis de 330 persoas descubriron fermosos recunchos, interesantes curiosidades e anécdotas dende o punto de vista dun tema en particular. Estes roteiros foron unha iniciativa do Concello de Allariz, a través da área de Turismo, para achegar o patrimonio material e inmaterial da vila á veciñanza e aos visitantes e turistas.

A empresa local, Xeitura patrimonio Scooperativa, foi a encargada de executar cada sábado esta actividade, unha iniciativa que tivo unha gran acollida, completando sempre a súa capacidade.

María López, concelleira de Turismo, considera que “é primordial coñecer o noso patrimonio para coidalo e divulgalo e niso debemos traballar as administracións, achegando á cidadanía este coñecemento para desfrute de todas as persoas, sobre todo das xeracións máis novas”.