Yolanda Díaz emociónase ao falar do seu pai: "Non concibo ser como son sen Suso Díaz"

A vicepresidenta segunda e ministra de Traballo e Economía Social, Yolanda Díaz, emocionouse co recoñecemento que fixo UXT ao seu pai, o sindicalista de CC.OO. Suso Díaz. "Monserrat Roig dicía que a democracia se aprende en casa, eu aprendina na miña casa, teño moi pouco mérito por tanto", resaltou.

"É moi fácil ser como son cando tes a sorte de ser a filla de Suso Díaz, só a emoción impídeme falar de Suso todo o que el se merece", dixo na súa intervención en Santiago este venres.

A Fundación Luís Tilve, da UXT, entregou os premios Traballo Digno 2023 a Suso Díaz, que foi secretario xeral de CC.OO. en Galicia, e José Carrillo, que foi secretario xeral de UXT-A Coruña.

"Non concibo ser como son sen Suso Díaz". "O meu modo de facer política, o meu compromiso coas persoas traballadoras deste país", conta que llo debe ao seu pai. "Un home ao que só lle podo dar as grazas", expresou.

"De Suso Díaz, o meu pai, non se que podo dicir sen emocionarme, é o fundador das Comisións Obreiras en Galicia", un sindicato ao que asentou "con autonomía e personalidade propia dentro do ámbito confederal". "Soubo moi ben separar o papel do sindicato e do partido", valora Yolanda Díaz.

Avisa de que "o sindicalismo non é só historia, é presente e é futuro". "Non hai democracia sen sindicalismo". "Non imos tolerar os ataques ao sindicalismo neste país", promete.

Durante a intervención da vicepresidenta, José Carrillo levoulle a Yolanda Díaz un pano de papel para secarse as bágoas. Ao terminar a súa toma da palabra, a ministra fundiuse en senllos abrazos co seu pai e con Carrillo, de quen puxo en valor o seu "bonhomía" como "figura de compromiso e progresía".

O acto de clausura contou, entre outros, co secretario xeral de UXT, Pepe Álvarez; o secretario xeral de UXT-Galicia, José Antonio Gómez; o presidente da Deputación da Coruña e secretario xeral do PSdeG, Valentín González Formoso; e a conselleira de Promoción do Emprego e Igualdade, Elena Rivo.

RECOÑECEMENTO A GONZÁLEZ LAXE

Previamente, en declaracións aos medios antes do acto, Yolanda Díaz dixo que é "unha honra" para ela estar neste acto, "porque a democracia se fai con fundacións como a Fundación Tilve e faise con sindicatos como o sindicato UXT".

Subliña que a Fundación Tilve está presidida polo expresidente socialista da Xunta Fernando González Laxe, unha persoa de "absoluto respecto e autoridade en Galicia". "Quero facer un pequeno encomio del: foi quen abriu as portas á Galicia moderna, a Galicia progresista, a esa Galicia que se parece moito ao goberno de coalición progresista do noso país", afirmou Díaz.

Tamén nesas declaracións dixo Yolanda Díaz que tanto o seu pai como Pepe Carrillo: "Explican parte do que eu son e do que eu represento, que é o valor do traballo digno". "Eles loitaron no noso país cando había risco de xogarse a vida". "Demostráronnos a mellor política, Carrillo en nome de UXT e Díaz en nome das Comisións Obreiras".

"Son dous exemplos tamén de unidade de acción. Son dous exemplos de que Galicia é mellor. Son dous exemplos, ambos, de conquistar dereitos fundamentais para a clase traballadora galega. Por tanto, permítanme dicir que si que estou emocionada", afirmou.

Yolanda Día na súa intervención nos Premios Luís Tilve | Fonte: Europa Press