Recomendacións ante a onda de frío: vestir 'por capas', con roupa que transpire e beber líquidos quentes

Empregar roupa que transpire e resistente ao vento e á humidade, tentar permanecer seco e beber líquidos quentes e azucarados. Estas son algunhas das recomendacións que fai a Consellería de Sanidade á poboación galega ante o forte descenso das temperaturas en gran parte de Galicia. O frío obrigará a que Meteogalicia active este sábado un aviso amarelo por uns valores que poderán descender dos 1 graos baixo cero no oeste e noroeste da provincia da Coruña e na comarca lucense da Mariña, así como dos 4 graos negativos no sur e centro de Lugo, no sur de Ourense e no interior da Coruña.

Neste contexto, Sanidade suxire aos galegos adoptar as "medidas idóneas para evitar ou reducir" o impacto da baixada de temperaturas na saúde. Así, no que respecta á vestimenta, a Consellería suxire empregar roupa non apertada e que transpire. Ademais, é preferible usar varias capas de roupa lixeira sobrepostas a levar unha soa de tecido groso. Ademais, Sanidade recomenda empregar roupa de abrigo resistente ao vento e á humidade, así como calzado impermeable e antiescorregadizo. Tamén sinala que hai que protexer a cabeza, o pescozo, os pés e as mans como zonas máis sensibles á perda de calor, e tentar permanecer seco, porque a roupa mollada arrefría o corpo máis rapidamente.

A Xunta suxire respirar polo nariz e non pola boca para quentar o aire que entra no corpo, beber líquidos quentes e azucarados (salvo contraindicación médica) e evitar o alcol. En caso de realizar un traballo físico baixo o frío, debe facerse con precaución, suavemente, procurando non esgotarse, especialmente se se sofre algunha doenza de tipo cardiorrespiratoria ou hipertensión. Se hai xeo na rúa, extremar as precaucións para evitar caídas que poden producir fractura de cadeira ou doutros ósos. Así mesmo, Sanidade pide aos galegos que manteñan o contacto coas persoas consideradas máis vulnerables a través de chamadas ou visitas para valorar a súa situación concreta e previr efectos graves das baixas temperaturas.

DOUS CENTROS DE ACCIÓN

De acordo con datos de Meteogalicia, o frío chegará porque a Comunidade estará este venres e nas primeiras horas do sábado entre dous centros de acción. Por unha banda, altas presións centradas nos Azores entrando en forma de cuña sobre o Golfo de Biscaia e, por outro, a borrasca 'Juan' en desenvolvemento no centro da península Ibérica. Isto conforma un corredor de isobaras que deixa ventos intensos do nordés e achega de aire frío procedente do continente europeo. Non só é que as temperaturas vaian ser baixas, senón que a sensación térmica estará bastante por baixo do valor que marque o termómetro debido ao vento.

Con todo, ao haber influencia do anticiclón, os ceos estarán despexados. A combinación de aire frío, ceo despexado e vento débil propiciará unha madrugada do sábado moi fría, con xeadas xeneralizadas mesmo ao nivel do mar. Este episodio de frío será breve. Irá remitindo o propio sábado a partir do mediodía, xa que os ventos cambiarán a suroeste e achegarán aire máis húmido, pero tamén máis morno, que suavizará moito os valores de temperatura e desembocarán nun domingo de temperatura xa normal ou, mesmo, elevada para esta época do ano.