Abre as portas Fitur, cunha oferta turística galega centrada nas peregrinacións, nos xeoparques e na nova visita á Illa de Tambo

A Feira Internacional de Turismo, Fitur, arrinca este mércores, día 24 de xaneiro, en Madrid, onde o expositor institucional da Xunta de Galicia acollerá preto de medio centenar de presentacións que profundarán na calidade do destino galego, así como na súa capacidade para ofrecer propostas que axuden a diversificar a oferta. Durante as xornadas profesionais, que se celebran desde o mércores ata o venres, tanto o Goberno autonómico como distintos concellos e entidades presentarán as súas novidades para 2024.

Entre outras, tal e como informou o Goberno galego nun comunicado, incluiranse algunhas da man da Xunta de Galicia para diversificar a peregrinación nos distintos itinerarios do Camiño de Santiago, presentaranse os xeoparques recoñecidos pola Unesco así como algúns recursos de recente incorporación para a súa visita como a Illa de Tambo. 

O expositor de Galicia acollerá tamén a presentación que realizarán diferentes concellos e xeodestinos con algúns dos produtos e iniciativas xurdidos ao redor dos seus Plans de Sustentabilidade Turística, entre outras moitas propostas. Conforme apuntou a Xunta, tamén haberá espazo de traballo habilitado para reunións de negocios, representado polo Clúster Turismo de Galicia, co obxecto de favorecer a súa dinamización e os seus contactos comerciais directos.

Ademais, Galicia ofrecerá tamén distintas demostracións culinarias comentadas por profesionais da cociña galega e degustacións, previa reserva, entre outros, de produtos pertencentes a Galicia Calidade, Agacal ou Galicia sabe Amar. Tamén se contará coa participación de alumnos e profesores do Centro Superior de Hostalaría de Galicia (CSHG) e habilitarase un espazo para mostrar o labor das redeiras e artesanía coa Asociación de Redeiras Illa da Estrela de Corme.

Ademais, a Xunta destacou que apostará pola accesibilidade, coa presenza de intérpretes en linguaxe de signos. Durante a feira tamén está previsto que Galicia recolla a testemuña do País Vasco para asumir a coordinación da marca turística do norte peninsular, a España Verde, nun acto que se celebrará o xoves.

Durante a fin de semana, a actividade da feira abrirase ao público. O expositor de Galicia seguirá coas demostracións culinarias comentadas, catas e degustacións, e incluirase a animación a cargo de figuras representativas dos Entroidos. Ademais, terán lugar as actuacións musicais de Mondra, o grupo Ailá e Lil Kids, a agrupación de danza urbana gañadora da novena e última edición de Got Talent España, cunha actuación dedicada ás Meigas.

Nesta edición 2024, Galicia reivindicarase como un destino de calidade, sustentable, diferenciado e respectuoso e todas estas actividades levarán a cabo no renovado expositor temático deseñado cun alto grao de orixinalidade ao redor dos recursos ligados á auga en todas as súas vertentes. A programación completa da actividade profesional no expositor da Xunta de Galicia está dispoñible na páxina de Turismo de Galicia, desde onde tamén se poderán seguir en directo en streaming algunhas das actividades programadas.