Ministros de campaña en Galicia

O ministro do Interior, Fernando Grande-Marlaska, e o de Presidencia, Xustiza e Relacións coas Cortes, Félix Bolaños, estiveron este domingo en Galicia participando en distintos actos electoriais do PSdeG para apoiar á candidatura de José Manuel Besteiro.

Grande-Marlaska mantivo este domingo un encontro co secretario provincial do PSOE de Lugo, José Tomé, en Monforte de Lemos, onde afirmou que este é "o momento" do PSdeG para facerse coa Xunta tras "moitos anos de política absolutamente pasiva". En declaracións aos medios, o socialista asegurou que a sociedade galega ten "ganas de cambiar" e de pasar páxina de anos de "deixar de prestar a atención debida aos servizos públicos, como a sanidade", ou á industria.

"Nos últimos 15 anos en Galicia perdéronse dous de cada 10 postos de traballo. O Goberno de España, o Goberno de Pedro Sánchez, desde o inicio estamos a apostar pola innovación, a reindustrialización e a reconversión", salientou.

BOLAÑOS

Tamén o ministro de Presidencia, Xustiza e Relacións coas Cortes, Félix Bolaños, avisou ao presidente da Xunta e candidato popular, Alfonso Rueda, así como ao líder do PP e expresidente galego, Alberto Núñez Feijóo, de que "miles de galegos" saíron este domingo ás rúas de Santiago de Compostela para dicirlles que "están a deixar a sanidade de pena".

Bolaños pronunciouse deste xeito durante unha visita ao municipio coruñés de Carnota, onde atendeu aos medios con motivo da súa estancia en Galicia para apoiar a candidatura do socialista José Ramón Gómez Besteiro á Xunta. De feito, ademais de en este paseo, o ministro intervén a última hora da tarde nun mitin en Cee en apoio ao político lucense.

Bolaños, que paseou polo municipio costeiro e tomou un café nun bar de pescadores, mostrou a súa satisfacción por estar en Galicia para "botar unha man aos compañeiros" do PSdeG nun contexto no que Galicia "se xoga moito" o próximo 18 de febreiro.