Feijóo centra as súas críticas no BNG e cuestiona que use 'Galiza': "Chamámonos Galicia desde hai séculos"
Apela aos indecisos para que Lugo repita como provincia "co mellor resultado", igual que nos anteriores xenerais e autonómicas.
Por Europa Press / Redacción | SANTIAGO DE COMPOSTELA | 10/02/2024 | Actualizada ás 23:20
O presidente do PP, Alberto Núñez Feijóo, volveu este sábado pola noite, nun mitin en Viveiro, a centrar as súas críticas no BNG, ao que as enquisas coinciden en sinalar como principal alternativa aos populares en Galicia.
Desde esta vila mariñá, tirou de ironía en diversas ocasións para cargar contra os nacionalistas de Ana Pontón e, neste sentido, referiuse ao debate en torno ao topónimo do país.
"Por non aceptar, non aceptan nin como nos chamamos, que están todo día dicindo que nos chamamos Galiza, que nos chamamos Galicia desde hai séculos", dixo, para recalcar a idea de que o BNG "non está nin sequera de acordo" na denominación do pobo ao que quere gobernar.
Nesta mesma liña, Feijóo tamén ironizou con que os de Pontón "non queren ser españois" senón "portugueses". Con todo, engadiu, volverían a España "inmediatamente" porque en Portugal "os partidos independentistas están prohibidos" e "non lles deixan presentarse ás eleccións".
Neste contexto, Feijóo reflexionou sobre que o PSdeG-PSOE, ao que as enquisas apuntan como terceira forza, xa non quere "seguir toureando", senón que tentará "integrarse na cuadrilla do BNG" se chega á Xunta.
