O PPdeG pide que se modifique o Real Decreto que obriga ao rexistro dos galiñeiros de autoconsumo
Levará ao Parlamento de Galicia, ás deputacións provinciais e aos concellos unha iniciativa para solicitar ao Goberno central.
Por Europa Press / Redacción | SANTIAGO DE COMPOSTELA | 17/03/2024 | Actualizada ás 11:58
O PPdeG levará ao Parlamento de Galicia, ás deputacións provinciais e aos concellos unha iniciativa para solicitar ao Goberno central que modifique o Real Decreto que obriga ao rexistro das explotacións avícolas para autoconsumo.
O coordinador de Medio Rural dos populares galegos, Avelino Souto, remarcou que esta nova medida "incrementa a excesiva carga burocrática" que "xa soporta" o sector agrogandeiro e "provoca" tanto un "abandono e desaparición de explotacións" como o "fomento do abandono" do propio rural.
O Executivo que dirixe Pedro Sánchez, lembrou o PPdeG, publicou en xullo de 2021 o decreto polo que se regulan as normas básicas de ordenación das granxas avícolas, no que se recolle que aquelas explotacións familiares que crían aves para o consumo propio, polo que non comercializan nin aves nin os seus produtos, deben estar inscritas no rexistro xeral de explotacións gandeiras.
"Trátase de máis de 50.000 explotacións de autoconsumo galegas que se verán obrigadas a inscribirse neste rexistro, o que supón máis carga burocrática e trabas para aqueles propietarios que non sacan ningún beneficio económico destas explotacións ao non comercializar a súa produción", explicou Souto.
Así, engadiu que o PPdeG "comparte o malestar" destes propietarios de galiñeiros de autoconsumo fronte á decisión de adoptada polo Goberno central, "sen contar para nada, unha vez máis", coa opinión das comunidades autónomas e lexislando de "costas ao territorio, sen atender ás peculiaridades de cada zona".
