Aberto o prazo de solicitude de axudas para promover o uso do galego no ámbito local

A Xunta abriu a convocatoria para que os concellos galegos e agrupacións dos mesmos que superen os 3.000 habitantes poidan solicitar as axudas para promocionar a lingua galega no ámbito local. O Diario Oficial de Galicia (DOG) publicou este mércores a resolución da Secretaría Xeral de Política Lingüística pola que se establecen as bases para esta liña de axudas, que conta cun orzamento de 350.000 euros.

As solicitudes poderán presentalas ata o 26 de abril e deberán facelo por medios electrónicos a través do formulario normalizado dispoñible na sede electrónica da Administración galega.

As entidades beneficiarias prestarán á poboación servizos lingüísticos baixo algunhas das tres modalidades obxecto de subvención: a creación dunha unidade técnica de traballo, o mantemento das xa existentes e a implantación de programas de dinamización lingüística.

Os concellos ou agrupacións beneficiarios terán a posibilidade de imputar os gastos derivados das accións normalizadoras que se realicen no período que vai desde o 1 de xaneiro ata o 15 de outubro de 2024.

Unha das aulas dun colexio. Alejandro Martínez Vélez - Europa Press