Carpetazo da Eurocámara ás denuncias de "manipulación" na TVG tras imporse os votos de PP e Vox
Ambos os grupos fixeron valer a súa maioría de 12 membros fronte aos 9 eurodeputados socialistas, verdes, e esquerda na sala
Por Europa Press / Redacción | BRUSELAS | 09/04/2024 | Actualizada ás 16:24
A Comisión de Peticións do Parlamento Europeo non dará seguimento ás denuncias de "manipulación" na Corporación Radio Televisión de Galicia (CRTVG), despois de que a maioría de Partido Popular Europeo e Conservadores e Reformistas, onde se encadra Vox, votase a favor de pechar a petición ao considerala "infundada".
Ambos os grupos fixeron valer a súa maioría de 12 membros fronte aos 9 eurodeputados socialistas, verdes, e esquerda na sala, algo que xerou as críticas do BNG que denunciou que eurodeputados 'populares' acudisen á comisión para "facer vulto".
Este martes, a Eurocámara estudou a denuncia dun grupo de traballadores de TVG sobre "manipulación informativa e falta de obxectividade, veracidade e pluralismo" da información no ente, acusando o Goberno da Xunta de Galicia de "intervir" na liña editorial do organismo e de "perseguir" aos traballadores que denuncian a situación nas protestas dos chamados 'venres negros'.
Unha representante da Comisión Europea explicou que a Lei de Medios aprobada recentemente fixa que os Estados membros fagan seguimento a través de mecanismos independentes de que se cumpre a liberdade de expresión nos medios públicos, garantan os fondos públicos e vixíen o nomeamento transparente dos membros de consellos de administración. Igualmente, insistiu en que son as autoridades nacionais as que deben investigar casos individuais e actuar para protexer a liberdade e o pluralismo.
O eurodeputado do PP, Francisco Millán Mon, rexeitou a petición dos traballadores de TVG asegurando que se basea en "opinións e xuízos de valores" que, segundo el, "non apoian" sentenzas xudiciais nin informes da Valedora do Pobo, fixándose en que a defensoría galega "deu a razón á dirección da CRTVG" fronte a denuncias dos profesionais do medio, que tamén teñen ao seu favor sentencias xudiciais por "vulneración" de liberdade de expresión.
As protestas "non reflicten o sentir da maioría dos 900 traballadores da cadea", considerou Millán Mon, indicando que o que resulta "vergoñoso" é o caso de RTVE onde se sucederon tres presidentes en tres anos. Así defendeu que TVG é a cadea autonómica máis vista en España e a que conta con máis credibilidade. "Non estamos ante o medio manipulado e parcial que se denuncia. A petición non está fundada e ten un rumbo político", resumiu.
Á súa vez, a súa compañeira de filas, Rosa Estarás, fixo unha defensa na mesma liña de TVG, contrapondo a situación á de RTVE que ten como nova presidenta a "unha militante socialista" e tras reprochar que o Goberno de Pedro Sánchez situou a persoas afíns en EFE, Correos ou o CIS.
Por contra, o eurodeputado socialista Nicolás González Casares asegurou que "a maior manipulación mediática en España" é a que se produce en TVG. "Xa está ben de que a televisión de Galicia estea ao servizo dos intereses dun partido. Sábeno todos os galegos", reiterou, incidindo en que a dirección do ente non deixa protestar a traballadores e a dinámica sucede desde a chegada de Alberto Núñez Feijoo ao Goberno da Xunta, desde cando se mantén o director xeral da TVG co mandato caducado.
Mentres, a representante do BNG, Ana Miranda, denunciou o "acoso" a traballadores da televisión galega e o uso con fins políticos do medio desde os tempos de Feijoo, insistindo en que se debe aplicar a nova lexislación europea que garanta a liberdade de prensa. "Xa abonda de manipulación. Seguiremos loitando", defendeu.
Esther Sanz, de Podemos, expresou o seu apoio á protesta dos traballadores de TVG, insistindo en que PP e Vox trataron de bloquear o debate parlamentario desta petición. "Non me estraña nada que o PP fixese isto coa televisión galega", dixo, apuntando que este caso se suma ao da televisión valenciana que tivo que pechar implicada en casos de corrupción.
