Atendidas 58 persoas en 48 accidentes de tráfico este fin de semana
Por E.P. | SANTIAGO DE COMPOSTELA | 03/06/2024 | Actualizada ás 11:11
Urxencias Sanitarias de Galicia-061 asistiu durante este fin de semana a 58 persoas que se viron implicadas en 48 accidentes de tráfico ocorridos nas estradas galegas. Segundo explican nun comunicado, o período contabilizado comprende desde as 15,00 horas do venres, 31 de maio, ata as 23,59 do domingo, 2 de xuño. O sábado foi o día no que se rexistraron máis sinistros, con 22 accidentes de tráfico.
A Central de Coordinación do 061, que xestiona e coordina os servizos prehospitalarios en casos de urxencia e emerxencia en Galicia, recibiu 62 chamadas en relación a accidentes de tráfico, que xeraron 48 asistencias sanitarias por parte do persoal do 061, que atendeu a un total de 58 persoas. Apuntan tamén que a proporción de homes e mulleres atendidos foi do 59% e do 41% respectivamente. Nas idades, obsérvase que o 33% dos atendidos tiña entre 35 e 49 anos.
Por provincias, A Coruña foi a que máis sinistros rexistrou con 21 accidentes de tráfico durante os desprazamentos, seguida moi de preto por Pontevedra, con 20. Os sete restantes producíronse en Lugo e a provincia de Ourense non notificou accidentes durante este fin de semana.
