As cooperativas agroalimentarias galegas alcanzan unha facturación de 2,1 millóns en 2023, con 6.000 empregos directos
Son datos das primeiras estimacións da Asociación Galega de Cooperativas Agroalimentarias (Agaca). Segundo datos de 2020 proporcionados por SAVES, o 47 % das persoas socias das cooperativas son mulleres.
Por Europa Press / Redacción | SANTIAGO DE COMPOSTELA | 03/06/2024 | Actualizada ás 17:47
As cooperativas agroalimentarias galegas alcanzan unha facturación de 2.180.000.000 euros en 2023, segundo as primeiras estimacións da Asociación Galega de Cooperativas Agroalimentarias (Agaca). A entidade celebrou este luns en Santiago de Compostela a 36ª edición da súa Asemblea Xeral Ordinaria, na que se aprobaron as contas anuais e o informe de xestión do exercicio 2023. Ademais, presentouse a memoria anual de actividades de 2023 e informouse sobre o plan anual de actividades previsto para 2024.
Diso informou Agaca nun comunicado, no que explica que, segundo o rexistro oficial, en Galicia existen 180 cooperativas agroalimentarias, que en 2022 contaban con aproximadamente 34.000 persoas socias. A facturación total estimada alcanzou os 2.180.000.000 euros, desagregada en 1.500.000.000 euros de facturación directa e 680.000.000 euros de facturación das sociedades de capital propiedade 100 % das cooperativas. Ademais, estas cooperativas proporcionaron emprego directo a máis de 6.000 persoas. As primeiras estimacións dos resultados do exercicio 2023 indican un incremento na facturación e nos resultados positivos respecto de 2022, o cal reflicte un crecemento sostido e unha xestión eficiente por parte das cooperativas.
IGUALDADE DE XÉNERO
A asociación destacou que o Sistema de Asistencia Virtual para o Cooperativismo e a Economía Social (SAVES), desenvolvido pola Universidade de Vigo en colaboración con Agaca no marco da Rede Eusumo, permitiu identificar as necesidades de información das cooperativas agrarias galegas e deseñar informes específicos sobre a súa evolución. Segundo datos de 2020 proporcionados por SAVES, o 47 % das persoas socias das cooperativas son mulleres. Ademais, representan o 34 % dos integrantes dos consellos reitores e o 20 % das presidencias das cooperativas.
Tras a Asemblea Xeral de Agaca, as distintas entidades que conforman o Foro pola Economía Social Galega (AGACA, ESPAZOCOOP, CEGASAL, AESGAL e AEIGA) celebraron a Asemblea da Economía Social Galega. Un acto inaugurado polo conselleiro de Emprego, Comercio e Emigración, José González Vázquez.
