Concéndense case 12 millóns en axudas a produtores amparados pola IXP Tenreira Galega
A Consellería do Medio Rural concede 11,37 millóns de euros para estas explotacións co fin de contribuír a paliar os sobrecustos
Por E.P. | Santiago de Compostela | 17/06/2024 | Actualizada ás 19:33
O Goberno galego analizou este luns a resolución das axudas convocadas por primeira vez este ano para as explotacións gandeiras amparadas pola indicación xeográfica protexida (IXP) Tenreira Galega.
A Consellería do Medio Rural concede 11,37 millóns de euros para estas explotacións co fin de contribuír a paliar os sobrecustos deste tipo de produción, sexan de Tenreira Galega (TG) ou de Tenreira Galega Suprema (TGS). En total, aprobáronse 4.578 solicitudes cunha axuda media por explotación de case 2.500 euros.
Sobre o número de animais subvencionados, alcanzouse unha cifra de 82.787, dos cales o 62% correspóndense a TGS, 200 euros por cada un, e o resto para TG, 36 euros por res. A resolución publicarase este martes, 18 de xuño, no Diario Oficial de Galicia (DOG). A Consellería puxo en marcha estas axudas debido aos incrementos dos custos para o sector gandeiro a causa do encarecemento das materias primas.
