Galicia avanza cara á neutralidade climática "a un ritmo tres veces maior" que a media de España e Europa
Desde a aprobación en 2019 da Estratexia galega de cambio climático e clima 2050 (EGCCE 2050), as emisións netas de gases de efecto invernadoiro baixaron en Galicia un 19,5 %, "tres veces máis que a media española (6 %) e europea (6,1 %)", segundo resaltou a conselleira de Medio Ambiente, Ángeles Vázquez.
Por Europa Press / Redacción | SANTIAGO DE COMPOSTELA | 21/06/2024 | Actualizada ás 17:17
A conselleira de Medio Ambiente e Cambio Climático, Ángeles Vázquez, puxo en valor que Galicia avanza cara á neutralidade climática a un ritmo "tres veces maior" que a media de España e a Unión Europea. Durante a súa visita ás instalacións de Vertex Bioenergy, con motivo da adhesión desta empresa á Alianza galega polo clima, a conselleira destacou que, desde a aprobación en 2019 da Estratexia galega de cambio climático e clima 2050 (EGCCE 2050), as emisións netas de gases de efecto invernadoiro baixaron en Galicia un 19,5 %, "tres veces máis que a media española (6 %) e que a europea (6,1 %)".
Nesta liña e tal e como recollen nun comunicado, tras o desenvolvemento de 139 medidas e de investimento de 1.140 millóns de euros, o Goberno galego aprobou esta mesma semana en reuniuna do Consello, a elaboración dun novo plan rexional integrado de clima e enerxía 2024-2030 para continuar co desenvolvemento da EGCCE 2050 "e consolidar así a posición da Comunidade como referente na loita contra o quecemento global". "Estamos a facer o que a cidadanía espera dos seus representantes políticos, que poñan en marcha medidas tanxibles, medibles e comparables, que dan resultados", defendeu Ángeles Vázquez, que subliñou ademais que, de cara a seguir progresando na resiliencia da comunidade, é necesario o apoio e compromiso de todos os axentes da sociedade.
ALIANZA GALEGA POLO CLIMA
Así, tal e como lembrou a conselleira, a Xunta promoveu a Alianza galega polo clima co obxectivo de conectar ao tecido produtivo e social galego de cara a traballar contra o quecemento global, facer máis resiliente á comunidade e establecer pautas de actuación para alcanzar a neutralidade climática. A iniciativa conta xa con máis de 140 entidades adheridas (universidades, autoridades portuarias, clubes deportivos ou empresas) e sumou este venres o apoio de Vertex Bioenergy, "líder na produción de bioetanol en España".
