A Xunta cifra en 500 millóns o sobrecusto dos servizos públicos no rural galego pola dispersión e o envellecemento

O presidente da Xunta, Alfonso Rueda, cifra en "ao redor de 500 millóns de euros" o sobrecusto de prestación de servizos no rural galego debido a unha poboación dispersa e envellecida. "E creo que quedamos curtos", sostén. No peche do foro Desafíos e Oportunidades da España rural, que organiza a Fundación Mapfre en colaboración coa Xunta en Santiago, Rueda subliña que "hai que ser capaz de prestar eses servizos", pois non se pode deixar que "se ensanchen esas diferenzas" entre vivir no rural e contornas urbanas, xa que "a ese desafío hai que darlle solución".

O obxectivo é que no rural "se viva ben" e "cada vez mellor", de forma que haxa "as mesmas oportunidades, dereitos e vantaxes" que nas zonas urbanas. Así, puxo en valor diferentes iniciativas "pioneiras" da Xunta, tales como casas niño de 0 a 3 anos, casas do maior, bonos coidado e Xantar na Casa, ademais de 14 polos de emprendemento.

Apela a "tentar por todos os medios" atraer mozos ao rural e que queden. Apunta a que "hai talento no rural" e deben "tomarse máis en serio" fenómenos como os dos nómades dixitais, que espera "se xeneralicen moitísimo máis". "Sei que queda moitísimo por facer", pero defende que hai que "atreverse a facer cousas aquí: algunhas terán éxito, outras non tanto". "O que nunca fai nada non se equivoca, pero tampouco acerta nunca", afirmou.

XORNADA

Nesta cita celebráronse dúas mesas redondas nas que expertos sinalaron que é posible reter talento e xerar oportunidades de negocio no rural de Galicia. Previamente, a inauguración da xornada, que se celebrou na Cidade da Cultura, correu a cargo o director xeral da Fundación Mapfre, Julio Domingo Souto, quen se referiu aos retos "complexos" que afronta a comunidade galega polo envellecemento e o despoboamento.

A Fundación Mapfre conta con 30 millóns en axudas ao rural ata 2027 (con 20 millóns do Fondo Social Europeo Plus). Galicia recibe preto medio millón de euros en apoios para seis proxectos que beneficiarán a unhas 200 persoas. Haberá unha nova convocatoria de subvencións no primeiro trimestre de 2025.

Pola súa banda, a directora de Programas Sociais da Fundación Mapfre, a infanta Elena de Borbón, destacou o labor desta entidade en Galicia ante retos existentes, principalmente no rural, pola "desaparición de oportunidades laborais", "perda de acceso a servizos esenciais" e o envellecemento da poboación.

Xornada da Fundación Mapfre sobre o rural | Fonte: DAVID CABEZON @ XUNTA