Susto na procesión do Carme en Moaña, catro persoas tiveron que ser rescatadas tras afundirse un barco

Catro persoas tiveron que ser rescatadas na tarde deste pasado martes en Moaña tras afundirse un barco mentres participaba na procesión do Día do Carme. Tal como informou o 112 Galicia, os feitos ocorreron sobre as 20.15 horas e foi a propia Garda Civil a que alertou ao Centro Integrado de Atención ás Emerxencias de que unha embarcación envorcara na zona de Punta Lagoa, fronte á costa de Moaña.

Despois, un particular informaba de que todos os tripulantes foran rescatados en barcos particulares e que non resultaron feridos. Pola súa banda, a embarcación afundida estaba a ser remolcada por un bateero que participaba na procesión.

Os voluntarios de Protección Civil tamén confirmaron que todos os ocupantes, en total catro persoal, estaban ilesos e foran trasladados a porto. Salvamento Marítimo desprazou ata o lugar a súa lancha Salvamar Mirach, mentres que tamén se deu aviso ao Servizo de Gardacostas de Galicia e á Policía Local.

Sala de operacións 112 Galicia | Fonte: XUNTA - Arquivo