Por Europa Press / Redacción | SANTIAGO DE COMPOSTELA | 22/07/2024 | Actualizada ás 13:51
'Somos máis' é o concepto co que o BNG construíu a súa nova sintonía oficial, unha canción que conta coas voces do cantante 'trad' Mondra e a rapera Nadie González e cuxo videoclip estivo a cargo da artista audiovisual Lara Caeiro. A peza, presentada este luns na sala Numax de Santiago, pretende mostrar unha "Galicia diversa" e "render homenaxe" a todas as persoas que a conforman.
A portavoz nacional do Bloque, Ana Pontón, foi a encargada de presentar a estrea da peza artística xunto ao equipo creativo da mesma. Así mesmo, Xosé Lois Romeu, responsable da música e da letra, destacou a combinación de estilos da canción, un tema no que se mestura o rap de Nadie, o son das pandereteiras de Bouba e a proposta de Mondra, que revisa e actualiza o tradicional.
Durante o acto, Pontón sinalou que o BNG se atopa no seu "mellor momento", polo que toca "mirar ao futuro con esperanza" e esta nova sintonía é unha "boa oportunidade" para representar a "diversidade dun país máis libre". Ao longo da súa historia, a formación contou con varias sintonías oficiais, entre elas, 'Wonderful Land', de Mike Oldfield, que usaron durante os anos 80 ata mediados dos 90, cando incorporaron o tema 'Xente', de Berrogüetto. Ademais, en 2010 utilizaron unha composición do centro galego de música tradicional aCentral Folque e, nas últimas eleccións a canción 'Fábrica de Luz', da Banda da Loba.
REPRESENTAR A DIVERSIDADE
Durante os máis de catro minutos que dura o videoclip de 'Somos máis', a peza explora diferentes recunchos de Galicia e retrata a aquelas persoas que os conforman, por exemplo o pescador Rogelio Santos, máis coñecido como o influencer do mar. A través dos ollos dunha nena o espectador percorre praias de Galicia, campos, costas e coñece ás súas xentes. A directora do vídeo, Lara Caeiro, explicou que a idea nace dun soño e representa esa Galicia coa que ela soñaba cando era pequena.
'Somos máis' representa "unha Galicia feminista, 'queer', con xente maior e nova, en definitiva, unha Galicia diversa", apuntou. Nesta liña, destacou que desde o primeiro momento tivo claro que quería fuxir dun concepto que se adoita mostrar en vídeos institucionais nos que se representa a Galicia desde unha mirada "épica".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.