Rescatadas catro persoas tras picarse o kaiak inchable no que pescaban en Nigrán
Unha persoa resultou ferida porque se cortou cunha man.
Por Europa Press / Redacción | PONTEVEDRA | 27/07/2024 | Actualizada ás 20:17
Catro persoas tiveron que ser rescatadas tras picarse o kaiak inchable no que pescaban fronte a praia América, en Nigrán. Segundo informou o 112, foron os propios implicados os que sobre as 15.45 horas deste sábado alertaron de que un dos tripulantes se cortou nunha man cun coitelo que usaba para pescar.
O utensilio tamén provocou que se picase a embarcación inchable, polo que tiveron que abandonala e subirse a unha batea para esperar o rescate.
A central de emerxencias solicitou a intervención de Urxencias Sanitarias de Galicia-061, e informaron a Salvamento Marítimo, a Gardacostas de Galicia, ao GES do Val Miñor, Policía Local e Protección Civil do Val Miñor.
Con todo, só foi necesaria a intervención dos servizos sanitarios, xa que foron recollidos por unha embarcación do club náutico e trasladounos ata o porto de Panxón. Unha vez alí, a persoa ferida foi atendida e evacuada ao centro hospitalario de referencia.
