O exconselleiro Agustín Hernández volve á Xunta como subdirector xeral en Augas
O tamén exalcalde de Santiago volve ocupar a súa praza como funcionario na Xunta de subdirector xeral de Infraestruturas Hidráulicas, cargo no que xa estivo nos anos noventa
Por E.P. | SANTIAGO DE COMPOSTELA | 07/08/2024 | Actualizada ás 17:11
O exalcalde popular de Santiago e exconselleiro de Medio Ambiente, Agustín Hernández (Madrid, 1961), volveu á Xunta como subdirector xeral de Xestión e Execución de Infraestruturas Hidráulicas en Augas de Galicia --dependente da Consellería de Medio Ambiente--.
En outubro de 2023, Hernández cesou como presidente do Consello Económico e Social (CES), cargou no que entrou en 2019, para ser substituído por Manuel Pérez Álvarez.
Agora, este enxeñeiro volve ocupar a súa praza como funcionario na Xunta de subdirector xeral de Infraestruturas Hidráulicas, cargo no que xa estivo nos anos noventa.
Precisamente, leste mesmo mércores, Agustín Hernández foi o encargado de explicar a obra levada a cabo de remodelación integral do parque de San Martiño, nunha zona inundable do río Anllóns, no municipio coruñés de Carballo, onde acompañou á conselleira de Medio Ambiente, Ángeles Vázquez.
Agustín Hernández Fernández de Rojas, enxeñeiro de Camiños, Canles e Portos, é funcionario do Corpo Facultativo Superior da Xunta de Galicia. Está en posesión do diploma de directivo da Escola Galega de Administración Pública (EGAP).
Da man de Alberto Núñez Feijóo entrou como conselleiro no primeiro Executivo que configurou o líder popular, no ano 2009. Del saíu anos máis tarde para asumir, en xullo de 2014, a alcaldía compostelá nun convulso mandato local (que finalizou en 2015) no que lle antecederon no cargo os tamén populares Gerardo Conde Roa e Ángel Currás.
Hernández, ao que se consideraba un dos 'homes fortes' do Goberno galego de Feijóo, dirixiu a alcaldía de Santiago case un ano, cando perdeu o bastón de mando municipal. Tampouco o conseguiu recuperar nas eleccións locais de maio de 2019, e poucos meses despois foi proposto para presidir o CES.
