A pobreza das pensións públicas: que futuro espera ás persoas que se retiren desde 2024?

O Goberno central, as organizacións de empresarios CEOE e CEPYME xunto cos sindicatos CCOO e UGT asinaron o 31 de xullo a reforma das pensións. O obxectivo do acordo é alongar o período laboral das persoas mediante modelos retributivos combinando salarios con parte da xubilación. A reforma, segundo o Goberno, busca que haxa cada vez máis persoas ocupadas sen que as “arcas” da Seguridade Social non se vexan prexudicadas. Para algunhas organizacións de pensionistas estamos diante dun ataque contra o sistema público de pensións para darlle cada vez máis peso ás mutuas privadas tanto para cobertura médica como para a realización de plans de pensións privados. Iso por unha parte, porque segundo as plataformas de pensionistas, nada ou pouco se di do incremento destes retiros fronte a un estado das cousas inflacionista e sen  sinais dunha posible solución a medio prazo.

OS PENSIONISTAS NON ESTÁN DE ACORDO
“O que están facendo Goberno, patronal e os sindicatos CCOO e UGT é ir contra o sistema público de pensións e levalo a un sistema privado que denomina Fondos de Promoción do Emprego” di Manuel Gundín, de Modepen. “Queren darlle máis competencias sanitarias ás mutuas privadas para restarllas á Seguridade Social e así reducir os períodos de baixa do traballador”.

“O último acordo asinouse sen a presenza doutras forzas sindicais e tampouco estaban os interesados, as persoas pensionistas, á parte, asinan o documento o 31 de xullo diante das vacacións de agosto” di Damián Rodríguez de COESPE. “O acordo fala de xubilación activa e xubilación parcial, isto profunda en reformas xa emprendidas como xubilarse aos 67 anos, que foi unha decisión unilateral”. Ademais, desde COESPE entenden que a extensión da idade laboral prexudica a entrada no mercado laboral de xente nova e mulleres.

Outro punto que non recolleu o acordo foi a equiparación das pensións mínimas ao salario mínimo interprofesional (1.134 euros por mes en 14 pagas). Esta equiparación suporía, en parte, que un número importante de pensionistas puidesen afrontar mellor a suba dos custos da vida. “Non se sabe como poden vivir con pensións de 700 euros ou algo máis” di Gundín. Preguntado por que o Goberno non busca a equiparación a súa resposta é que “o goberno non quere dar máis diñeiro e así teñen ás persoas traballando e cobrando parte da súa pensión”.

“Buscan unha eliminación parcial do sistema público para deixalo case como un sistema de beneficencia” di Damián Rodríguez. Por outra parte, se se quere ampliar a idade de traballo facendo unha combinación entre salarios e xubilación redúcense unha serie de prestacións públicas que irán parar a mans privadas. Doutra banda “sucederá como en Alemaña, Grecia ou Italia onde os pensionistas, con sistemas iguais ao presentado aquí, buscan traballos, os 'minijobs', para complementar a pensión”.

PENSIÓNS E PENSIONISTAS
“As organizacións de pensionistas son asociacións legais que deberan participar na negociación de calquera reforma sobre pensións” di Gundín. “Desde o mes de maio fixemos 30 peticións para reuniriso coa ministra de Seguridade Social e tratar as pensións dentro dos orzamentos para 2025, mais aínda non dixeron nada” apunta Rodríguez. Isto último sinala aos gastos que, segundo o Goberno, supoñen as pensións para o Estado. En total, as pensións contributivas estarían cubertas por 190.687 millóns de euros, o que “é un grande negocio para as mutuas privadas”, “un pastel do que gostarían sacar un anaco”.

A día de hoxe as pensións medias máis elevadas están en Euskadi con 1.552,70 euros, Asturias con 1.466,32 euros, Cataluña 1.306,12 euros, mentres que Galicia ten 1.075,74 euros de pensión media (vinte euros sobre a de Extremadura). A media estatal está en 1.255,68 euros, unha diferenza de 180 euros por encima da galega. Estas son as pensións contributivas que, segundo o Goberno central, supoñen algo máis do 11% dos orzamentos.

Os pensionistas non van parar e así o 26 de outubro haberá concentracións contra o desmantelamento do sistema público de pensións. O 30 de decembro haberá unha mobilización estatal reclamando seren escoitados polo Goberno e axentes sociais.