Radiografía do emprego mozo en Galicia: falta de oportunidadades e baixos salarios
Un informe de UGT-Galicia destaca que está entreos catro territorios coa taxa de actividade xuvenil máis baixa do Estado.
Por Europa Press / Redacción | SANTIAGO DE COMPOSTELA | 09/08/2024 | Actualizada ás 11:57
Con motivo da celebración do Día Internacional da Mocidade, que se conmemora o 12 de agosto, UGT-Galicia fixo pública unha radiografía do mercado laboral galego centrada nos máis novos e que, segundo destacou o sindicato, mostra "falta de oportunidades", a pesar de que Galicia ten pouca poboación nesta franxa de idade, que se reflicte en "taxas de actividade moi baixas, altos índices de desemprego e baixos salarios".
Con todo, tal e como trasladou UGT nunha nota de prensa, si hai unha variable que mellora: a temporalidade. Neste sentido, o sindicato subliñou que a reforma laboral "segue dando os seus froitos" e permite que a contratación indefinida "mellore tamén neste sector da poboación".
Entre as conclusións que saca deste informe, UGT afirma que Galicia está entre as catro comunidades autónomas coa taxa de actividade xuvenil máis baixa do Estado, do 47,2%, fronte ao 53,8% de media ou datos como o de Cataluña, por encima do 62%. Ademais, cualifica de "devastador" o indicador da taxa de paro xuvenil no mercado laboral galego, que "sobe en Galicia ata o 18,1%, moi afastada do 9,7% do conxunto de idades".
Por sectores, UGT destaca a "gran dependencia" do sector servizos na ocupación da mocidade, "o 77,9%", e alerta de falta de substitución xeracional no sector primario e na construción. Así mesmo, expón que o 26,6% dos mozos traballan a tempo parcial, "case 13 puntos por encima do conxunto de idades". No grupo de 16 a 19 anos "a parcialidad chega aos 54 puntos".
FENDA SALARIAL
Neste contexto, o sindicato sinala que unha das consecuencias "máis evidentes" destas variables son os baixos salarios. Así, asegura que a brecha salarial no grupo de 25 a 34 anos é de "máis de 20 puntos", en relación ao conxunto de idades, e de 14 en relación ao mesmo grupo de idade no resto do Estado.
De media, no conxunto do Estado os mozos cobraron en 2022 22.484,94 euros, mentres que en Galicia esta cifra situouse nos 19.310,44 euros. A pesar destas conclusións, UGT insiste en que "a resignación non é unha opción" e en que "hai posibilidades de mellora", como así demostra, engadiu, "a reforma laboral, froito do diálogo social".
Así, apela ao diálogo social, tanto a nivel estatal como en Galicia para "seguir abrindo vías de traballo que permitan chegar a acordos que vaian na mesma liña para mellorar as taxas de emprego, a actividade dos máis novos e os seus salarios".
