Nova alerta sanitaria un ano despois de rematar a covid: a vexiga do mono

O Ministerio de Sanidade informou de que o vindeiro luns 19 de agosto terá lugar unha reunión dun grupo técnico para pór en común e discutir as actuacións que se deriven da emerxencia sanitaria internacional polo brote de mpox (anteriormente coñecido como vexiga do mono) en África. No encontro participarán o Centro Coordinación de Alertas e Emerxencias Sanitarias, o Centro Nacional de Epidemiología, o Centro Nacional de Microbiología, a División de VIH e Vacinas.

Ese mesmo día 19, España participará no Comité de Seguridade Sanitaria da UE xunto ao resto de países para analizar a situación. Ademais, o Ministerio comunicou que o día 20 reunirase o 'relatorio de alertas' da que forman parte representantes de todas as comunidades autónomas para debater se se modifica algunha recomendación de vixilancia ou vacinación.

Desde o inicio do brote en 2022 notificáronse en España un total de 8.104 casos confirmados de infección por mpox en 17 Comunidades Autónomas, 7.521 en 2022. En 2024 ata o día 8 de agosto notificáronse á Rede Nacional de Vixilancia Epidemiolóxica (RENAVE) un total de 264 casos de mpox, a maioría dos casos en homes cunha mediana de idade de 37 anos e nados en España. No último mes, notificáronse casos en 9 comunidades autónomas: Comunidade de Madrid (116 casos), Andalucía (67), Cataluña (22), Baleares (10), Comunidade Valenciana (11), Galicia (6), Castela a Mancha (6), País Vasco (5), Castela e León (3), Canarias (3), Estremadura (1) e Murcia (1).

O Ministerio tamén lembrou que a vacinación en España iniciouse en xuño de 2022 e as indicacións actualmente son para grupos de risco: persoas que manteñen prácticas sexuais de risco, especialmente pero non exclusivamente GBHSH (gais, bisexuais e homes que teñen sexo con homes) e persoas con risco ocupacional.

Este é o caso de persoal sanitario en consultas especializadas en atención de ITS/VIH que atenden a persoas con prácticas de alto risco e persoal de laboratorio que manexan mostras potencialmente contaminadas con virus monkeypox ou persoal que se encarga da desinfección de superficies en locais específicos onde se manteñen relacións sexuais de risco, sempre que non se poida garantir o uso adecuado de elementos de protección individual. Ademais, dos contactos estreitos que non pasasen a enfermidade.

A OMS decretou a emerxencia de saúde pública de preocupación internacional, o seu nivel de alerta máis alto, polo brote de mpox en África, xurdido en República Democrática do Congo (RDC) e causado por unha nova cepa máis grave e letal. O número de casos no que vai de ano superou o total do ano pasado, con máis de 14.000 diagnósticos e 524 mortes.