Crece a demanda de actividades de sendeirismo en Galicia: "Ten un labor social e cultural"
Así o apunta o presidente dunha entidade que promove rutas e que destaca a presenza de máis mulleres e persoas de entre 35 e 50 anos.
Por Europa Press / Redacción | Santiago de Compostela | 18/08/2024 | Actualizada ás 17:03
O interese polo sendeirismo crece cada ano en Galicia, especialmente desde a pandemia, e por motivos vinculados, sobre todo, ao benestar emocional. Así o expón, en declaracións a Europa Press, Sindo Rodríguez, presidente de Galicia Sendeirismo, entidade con 14 anos de traxectoria e que xurdiu pola propia situación do seu presidente. "Estaba a facer outros deportes e empecei co sendeirismo a partir dunha lesión".
Anos despois, o que empezou como algo a nivel particular foise estendendo coa implicación e colaboración doutras persoas. Agora é unha asociación "que funciona como Turismo Activo de Galicia". Sindo Rodríguez remarca o aumento de persoas interesadas por mor da pandemia. "Pola forma de vida da xente, o sendeirismo é unha maneira de facer actividades, ten un labor social e cultural", sostén.
Especialmente remarca aqueles que buscan unha "maneira de cargar as pilas" e deixar ao carón a tensión ou a ansiedade "polo tipo de vida". "Hai xente que lles gusta a natureza, outras facer deporte, outra socializar", expón. No seu caso, a través da súa web, propoñen distintas rutas que se fan con apoio de guías con titulación e cunha análise previa das mesmas e que varían en función da época do ano. Inclúen non só traxectos, con distintas distancias, senón outras propostas como acabar o percorrido cunha actividade como o kaiak. "Cada vez apúntase máis xente, principalmente de 35 a 50 anos e máis mulleres que homes", precisa tamén sobre o perfil das persoas que participan.
BENEFICIOS
E é que, segundo estudos sobre os seus beneficios, o sendeirismo axuda a reducir emocións negativas, reduce os niveis de tensións e tamén ten vantaxes a nivel físico como mellorar a saúde cardiovascular.
Para practicalo, aconséllase usar o material adecuado, como o calzado ou pantalóns longos ou bastón de trekking, en función do traxecto, e informarse, previamente, das condicións da ruta e consultar a predición meteorolóxica, coas indicacións adecuadas en cada caso.
En liña co exposto polo presidente de Galicia Sendeirismo, persoas que practican esta actividade, nalgúns casos en grupos, xa sexa apuntándose a rutas ou ben con coñecidos, e noutros en solitario, inciden no que lles achega, sobre todo, a nivel persoal.
