Continúa a loita contra os lumes en Galicia

O incendio forestal de San Cristovo de Cea quedou extinguido mentres os distintos focos iniciados onte xoves en San Cibrao das Viñas -- ambos os municipios na provincia de Ourense -- están controlados. Así o informou a Consellería do Medio Rural que no caso do incendio da parroquia de Oseira, que se iniciou ás 16.24 horas do pasado martes, eleva a 58,06 hectáreas de superficie arboredo afectado.

O mesmo quedou extinguido ás 22.33 horas de onte xoves. Para o seu control, mobilizáronse cinco técnicos, 34 axentes, 54 brigadas, 35 motobombas, catro pas oito avións e outros tantos helicópteros. Entre as brigadas mobilizadas, participaron tamén nos labores de extinción dous equipos de bombeiros de Estonia que se atopaban de estancia en Galicia no marco do mecanismo europeo de protección civil.

SITUACIÓN EN SAN CIBRADO

Por outra banda, no caso de San Cibrao das Viñas, con varios focos distintos, dous deles próximos á A-52, dáse por controlado. Os dous primeiros focos, segundo explicou a alcaldesa da localidade, Marta Novoa, rexistráronse ao redor das 18.30 horas, no lugar de Barreiros, preto das obras do AVE e nunha zona de naves industriais, e en Outeiro Calvo. Precisamente, pouco tempo despois e próximo a este último punto, orixinouse un terceiro foco.

A Consellería do Medio Rural manifestou que están todos controlados desde a madrugada, cunha afectación total de nove hectáreas, e co despregamento de nove axentes, 18 brigadas, doce motobombas, unha pa, un técnico, nove avións e sete helicópteros. Por outra banda, tamén en Ourense houbo un conato en Cortegada en menos dunha hectárea e un incendio en Vilamartín, que afectou a tres hectáreas, en ambos os casos controlados.

Varios bombeiros tratan de apagar o lume durante o incendio forestal na parroquia de Oseira | Fonte: Rosa Veiga - Europa Press